NGOKUKAMATHEWU 27

₁Kwathi sekusile, bonke abapristi abakhulu namalunga esizwe benza icebo ngoJesu lokuba bambulale;

₂bambopha, bamuka naye, bamnikela kuPilatu umbusi.

₃Khona uJuda owamkhaphelayo, ebona ukuthi ulahliwe, wazisola, wabuyisela izinhlamvu zesiliva ezingamashumi amathathu kubapristi namalunga,

₄wathi: Ngonile ukuba ngikhaphele igazi elingenacala. Bona bathi: Kuyini lokho kithi na? Zibonele wena.

₅Wayesephonsa izinhlamvu zesiliva ethempelini, wamuka, waziphanyeka.

₆Kepha abapristi abakhulu bazithatha izinhlamvu zesiliva, bathi: Akuvunyelwe ukuzifaka emnikelweni, ngokuba kuyimali yegazi.

₇Benza icebo, bathenga ngayo insimu yombumbi, ibe-ngeyokumbela abafokazi.

₈Ngalokho insimu leyo ithiwa insimu yegazi kuze kube-namuhla.

₉Khona kwagcwaliseka okwashiwo ngomprofethi uJeremiya ukuthi: Bathatha izinhlamvu zesiliva ezingamashumi amathathu, inani lowamiselwa inani onani lakhe lamiswa ngamadodana kaIsrayeli;

₁₀bakhokha ngazo insimu yombumbi, njengokuba iNkosi ingiyalile.

₁₁Kepha uJesu wayemi phambi kombusi; umbusi wambuza wathi: Wena uyinkosi yabaJuda na? UJesu wathi kuye: Usho khona.

₁₂Kwathi lapho abapristi abakhulu namalunga bemthwesa icala, kaphendulanga-lutho.

₁₃Khona uPilatu wathi kuye: Awuzwa yini lokho okungaka abakufakaza ngawe na?

₁₄Akaze amphendula nakwelilodwa izwi, umbusi waze wamangala kakhulu.

₁₅Kepha ngomkhosi umbusi wayejwayele ukukhululela isixuku isiboshwa sibe-sinye esasisithanda.

₁₆Ngalesosikhathi babenesiboshwa esidumileyo esithiwa uBaraba.

₁₇Ngakho sebebuthene, uPilatu wathi kubo: Nithanda ukuba nginikhululelebani, uBaraba nokuba uJesu othiwa uKristu, na?

₁₈Ngokuba wayekwazi ukuthi bamnikele ngomhawu.

₁₉Esahlezi esihlalweni sokwahlulela, umkakhe wathumela kuye, wathi: Ungabi-nandaba kulowomuntu olungileyo; ngokuba ngihluphekile kakhulu namuhla ngaye ephusheni.

₂₀Kepha abapristi abakhulu namalunga bancenga izixuku ukuba zicele uBaraba, zimbulale uJesu.

₂₁Wayesephendula umbusi, wathi kubo: Nithanda ukuba nginikhululele muphi kulaba ababili na? Bathi: UBaraba.

₂₂UPilatu wathi kubo: Pho-ke, ngimenze-njani uJesu othiwa uKristu na? Bonke bathi: Makabethelwe esiphambanweni.

₂₃Wayesethi: Ngokuba wenzé-bubi buni na? Kepha bamemeza kakhulu, bathi: Makabethelwe esiphambanweni.

₂₄UPilatu esebona ukuthi akanakwenza-lutho nokuthi isiphithiphithi sesanda kakhulu, wathatha amanzi, wahlamba izandla phambi kwesixuku, wathi: Anginacala egazini lalomuntu; ziboneleni nina.

₂₅Abantu bonke base bephendula bethi: Igazi lakhe malibe-phezu kwethu naphezu kwabantwana bethu.

₂₆Wayesebakhululela uBaraba, kepha wamshaya uJesu, wamnikela ukuba abethelwe esiphambanweni.

₂₇Khona amabutho ombusi ayesemthatha uJesu, amngenisa enqabeni, aqoqela kuye ibutho lonke.

₂₈Amhlubula, amembathisa ingubo ebomvu,

₂₉aluka umqhele wameva, awufaka ekhanda lakhe, nomhlanga esandleni sakhe sokunene, aguqa ngamadolo phambi kwakhe, ambhinqa athi: Bayede, nkosi yabaJuda!

₃₀Amkhafulela ngamathe, athatha umhlanga, amshaya ekhanda lakhe.

₃₁Esembhinqile amhlubula ingubo, amembathisa izingubo zakhe, amuka naye ukuyombethela esiphambanweni.

₃₂Esaphuma afumana umuntu waseKhurene, nguSimoni igama lakhe; amcindezela lowo ukuba athwale isiphambano sakhe.

₃₃Esefikile endaweni ethiwa iGolgotha okungukuthi iNdawo yeKhanda,

₃₄amphuzisa iwayini elixutshwé nenyongo; kepha kuthé elizwa, akathandanga ukuliphuza.

₃₅Esembethele esiphambanweni abelana izingubo zakhe, enzelana inkatho;

₃₆ahlala amlinda khona.

₃₇Abeka ngaphezu kwekhanda lakhe icala lakhe libhalwé ngokuthi: lo ngujesu, inkosi yabajuda.

₃₈Kwabethelwa kanye naye abaphangi ababili, omunye ngakwesokunene nomunye ngakwesokhohlo.

₃₉Kepha abadlulayo bamhlambalaza benikina amakhanda abo,

₄₀bathi: Wena odiliza ithempeli, ubuye ulakhe ngezinsuku ezintathu, zisindise, uma uyiNdodana kaNkulunkulu, wehle esiphambanweni.

₄₁Kanjalo nabapristi abakhulu bambhinqa kanye nababhali namalunga, bathi:

₄₂Wasindisa abanye, angezisindise yena; uyinkosi yakwaIsrayeli; akehle manje esiphambanweni, sikholwe nguye.

₄₃Wethembile uNkulunkulu; makamkhulule manje, uma emthanda, ngokuba wathi: NgiyiNdodana kaNkulunkulu.

₄₄Kepha nabaphangi ababebethelwe esiphambanweni kanye naye bamdumaza kanjalo.

₄₅Kepha kusukela ngehora lesithupha kwaba-mnyama emhlabeni wonke, kwaze kwaba-yihora lesishiyagalolunye.

₄₆Kepha ngehora lesishiyagalolunye uJesu wamemeza ngezwi elikhulu, wathi: Eli, Eli, lama sabaktani? okungukuthi: Nkulunkulu wami, Nkulunkulu wami, ungishiyeleni na?

₄₇Abanye kwababemi khona bekuzwa bathi: Lo ubiza uEliya.

₄₈Masinyane omunye kubo wagijima, wathatha ilula, waligcwalisa ngoviniga, walihloma emhlangeni, wamphuzisa.

₄₉Kepha abanye bathi: Yeka, sibone uma uEliya eza ukumsindisa.

₅₀UJesu wabuye wamemeza ngezwi elikhulu, wafa.

₅₁Bheka-ke, isihenqo sethempeli sadabuka kabili, kusukela phezulu kuze kufike phansi; umhlaba wazamazama, amadwala aqhekezeka;

₅₂amathuna avuleka, imizimba eminingi yabangcwele ababelele yavuka;

₅₃baphuma emathuneni emva kokuvuka kwakhe, bangena emzini ongcwele, babonakala kwabaningi.

₅₄Kepha induna yekhulu nababenayo belinda uJesu sebebona ukuzamazama nalokho okwenzekileyo besaba kakhulu, bathi: Nempela lo ubeyiNdodana kaNkulunkulu.

₅₅Kwakukhona lapho abesifazane abaningi bebukela, bekude, ababemlandele uJesu bevela eGalile, bemkhonza;

₅₆phakathi kwabo kwakukhona oMariya Magdalena, unina kaJakobe nokaJose, nonina wamadodana kaZebedewu.

₅₇Sekuhlwile, kwafika umuntu ocebileyo waseArimatheya, igama lakhe nguJosefa, owayengumfundi kaJesu naye;

₅₈lo waya kuPilatu, wacela isidumbu sikaJesu. Khona uPilatu wayala ukuba anikwe sona.

₅₉UJosefa wasithatha isidumbu, wasisonga ngendwangu enhle ehlanzekileyo,

₆₀wasibeka ethuneni lakhe elisha ayeliqophé edwaleni, wagingqela itshe elikhulu emnyango wethuna, wahamba.

₆₁Kepha kwakukhona lapho uMariya Magdalena nomunye uMariya behlezi phambi kweliba.

₆₂Kepha ngangomuso okungolulandela usuku lokulungisela abapristi abakhulu nabaFarisi babuthana kuPilatu,

₆₃bathi: Nkosi, sikhumbula ukuthi lowomkhohlisi esekhona wathi: Emva kwezinsuku ezintathu ngizakuvuka.

₆₄Ngakho yala ukuba iliba ligcinwe kuze kube-lusuku lwesithathu ukuba abafundi bakhe bangaze bafike bamebe, bathi kubantu: Uvukile kwabafileyo; kuthi inkohliso yokugcina ibembi kuneyokuqala.

₆₅UPilatu wathi kubo: Nampa abalindi; hambani niligcine njengokubona kwenu.

₆₆Base behamba, baligcina iliba, babeka uphawu etsheni bekanye nabalindi.