NGOKUKALUKA 22

₁Kwasondela umkhosi wesinkwa esingenamvubelo othiwa iPhasika.

₂Abapristi abakhulu nababhali bafuna ukuba bangambulala kanjani; ngokuba babesaba abantu.

₃Kepha uSathane wangena kuJuda othiwa uIskariyothe engowabayishumi nambili.

₄Wasuka wakhuluma nabapristi abakhulu nezinduna ngokuthi angamkhaphela kanjani kubo.

₅Bathokoza, bavumelana naye ukumnika imali.

₆Wavuma-ke, waze wafuna ithuba lokumkhaphela kubo, singekho isixuku.

₇Lwase lufika usuku lwesinkwa esingenamvubelo okumelwe ukuba kuhlatshwe ngalo iphasika.

₈Wathuma oPetru noJohane, wathi: Hambani niye ukusilungisela iphasika ukuba sidle.

₉Bathi kuye: Uthanda ukuba sikulungiselephi na?

₁₀Wathi kubo: Bhekani, seningené emzini niyakuhlangana nomuntu othwele imbiza yamanzi; mlandeleni, niye endlini angena kuyo,

₁₁nize nithi kumninindlu: Uthi uMfundisi kuwe: Liphi ikamelo lokungenisa, lapho ngingadlela khona iphasika nabafundi bami, na?

₁₂Lowo-ke uzakunikhombisa ikamelo elikhulu eliphezulu, elendlelweyo; lungiselani lapho.

₁₃Basuka, bafumana kunjengokusho kwakhe kubo; base belungisa iphasika.

₁₄Kwathi ukuba kufike isikhathi, wahlala phansi, nabaphostoli kanye naye.

₁₅Wayesethi kubo: Nginxanele nokunxanela ukudla nani leliphasika ngingakahlupheki.

₁₆Ngokuba ngithi kini: Angisayikulidla ngempela, lize ligcwaliseke embusweni kaNkulunkulu.

₁₇Wamukela isitsha, wabonga wathi: Thabathani lokhu, nabelane;

₁₈ngokuba ngithi kini kusukela manje angisayikuphuza okwesithelo somvini, uze ufike umbuso kaNkulunkulu.

₁₉Wayesethabatha isinkwa, wabonga, wasihlephula, wabanika, wathi: Lokhu kungumzimba wami onikelwa nina; yenzani lokhu ukuba ningikhumbule.

₂₀Kanjalo-ke nesitsha emva kokudla, ethi: Lesisitsha siyisivumelwano esisha egazini lami elithululelwa nina.

₂₁Kepha bhekani, isandla songikhaphelayo sinami etafuleni.

₂₂Ngokuba iNdodana yomuntu isihamba njengokumisiweyo, kepha maye kulowomuntu ekhashelwa ngaye!

₂₃Base beqala ukubuzana bodwa ukuthi kungaze kube-ngubani kubo ozakukwenza lokho.

₂₄Kwavela nokuphikisana phakathi kwabo kokuthi ngumuphi kubo ongathiwa omkhulu.

₂₅Wayesethi kubo: Ababusi bezizwe bazenza amakhosi phezu kwazo, neziphathimandla zazo zithiwa abazenzela okuhle.

₂₆Kepha nina aninjalo; kodwa omkhulu kini makabe-njengomncinyane, nobusayo makabe-njengokhonzayo.

₂₇Ngokuba ngumuphi omkhulu, ohlezi ekudleni noma okhonzayo, na? Akusiye ohlezi ekudleni na? Kepha mina ngiphakathi kwenu njengokhonzayo.

₂₈Nina-ke ningababekhuthazela nami ekulingweni kwami;

₂₉nanjengokuba uBaba engimisele umbuso, nami nginimisela wona

₃₀ukuba nidle, niphuze etafuleni lami embusweni wami; niyakuhlala ezihlalweni zobukhosi, nahlulele izizwe eziyishumi nambili zakwaIsrayeli.

₃₁Simoni, Simoni, bheka, uSathane unifunile ukuba anihlunge njengokolweni;

₃₂kepha mina ngikunxusele ukuba ukukholwa kwakho kungapheli; wena-ke, nxa usuphendukile, uqinise abafowenu.

₃₃Wathi kuye: Nkosi, ngilungele ukuya nawe nasetilongweni nasekufeni.

₃₄Wayesethi: Ngiyakutshela, Petru, ukuthi iqhude aliyikukhala namhla nje, ungakangiphiki kathathu ukuthi awungazi.

₃₅Wathi kubo: Mhla nginithuma ningenasikhwama, nayika, nazicathulo, naswela utho na? Bathi: Lutho.

₃₆Wayesethi kubo: Kepha manje onesikhwama kasithathe, neyika futhi; oswelayo kathengise ngengubo yakhe, athenge inkemba.

₃₇Ngokuba ngithi kini: Kumelwe ukugcwaliseka kimi lokho okulotshiweyo kokuthi: Wabalwa kanye nezelelesi; ngokuba okuqondene nami sekuyaphelela.

₃₈Base bethi: Nkosi, bheka, nazi izinkemba ezimbili. Wathi kubo: Kwanele.

₃₉Wayesephuma, waya eNtabeni yemiNqumo njengomkhuba wakhe, nabafundi bakhe bamlandela.

₄₀Esefikile endaweni wathi kubo: Khulekani ukuba ningangeni ekulingweni.

₄₁Wamonyuka kubo kungathi ibanga lokuphonsa itshe, waguqa phansi, wakhuleka,

₄₂wathi: Baba, uma uthanda, susa lesisitsha kimi; nokho makungenziwa intando yami kodwa eyakho.

₄₃Kwabonakala kuye ingelosi ivela ezulwini, imqinisa.

₄₄Esosizini olunzima wakhuleka eqinisela, izithukuthuku zakhe zaba-njengamathonsi egazi, aconsela emhlabathini.

₄₅Esesukumé ekukhulekeni weza kubafundi bakhe, wabafumana belele ngokudabuka.

₄₆Wathi kubo: Nilaleleni na? Vukani nikhuleke ukuba ningangeni ekulingweni.

₄₇Esakhuluma, bheka, kwafika isixuku; naye othiwa uJuda, omunye wabayishumi nambili, wayehamba phambi kwabo, wasondela kuJesu ukumanga.

₄₈Kepha uJesu wathi kuye: Juda, uyayikhaphela iNdodana yomuntu ngokuyanga na?

₄₉Kuthé ababengakuye sebebona okuzakwenzeka, bathi: Nkosi, sigadle ngenkemba na?

₅₀Omunye othile kubo wayigadla inceku yompristi omkhulu, wayinquma indlebe yokunene.

₅₁Kepha uJesu wathatha wathi: Musani; sekwanele. Wayiphatha indlebe, wayipholisa.

₅₂Wathi uJesu kubapristi abakhulu, nezinduna zethempeli, namalunga ababezé kuye: Niphumile kungathi nizé kumphangi niphethe izinkemba nezinduku.

₅₃Benginani imihla ngemihla ethempelini, anelulanga-zandla kimi; kepha lokhu kuyihora lenu namandla obumnyama.

₅₄Base bembamba, bamuka naye, bamusa endlini yompristi omkhulu. UPetru walandela ekude.

₅₅Sebebasile umlilo phakathi egcekeni bahlala phansi ndawonye; uPetru wahlala phakathi kwabo.

₅₆Intombazana ethile, imbona ehlezi ngasemlilweni, yamgqolozela yathi: Nalona ubenaye.

₅₇Kepha waphika, wathi: Sifazane, angimazi.

₅₈Emva kwesikhashana omunye wambona, wathi: Nawe ungomunye wabo. Kepha uPetru wathi: Muntundini, angisiye.

₅₉Sekudlulile okungathi ihora linye, omunye umuntu waqinisa wathi: Impela nalona ubenaye, ngokuba futhi ungowaseGalile.

₆₀Kepha uPetru wathi: Muntundini, angikwazi ukuthi uthini. Masinyane esakhuluma, lakhala iqhude.

₆₁INkosi yayisiphenduka, yambheka uPetru. UPetru walikhumbula izwi leNkosi, njengokuba ithé kuye: Iqhude lingakakhali namhla nje, uzakungiphika kathathu.

₆₂Waphumela phandle, wakhala kamunyu.

₆₃Amadoda abembambile uJesu ambhinqa emshaya.

₆₄Ammboza ubuso, ambuza ethi: Profetha ukuthi ngubani okushayileyo na?

₆₅Nokunye okuningi akukhuluma kuye emthuka.

₆₆Kwathi sekusile, kwabuthana amalunga abantu nabapristi abakhulu nababhali, bamyisa emphakathini wabo,

₆₇bathi: Uma unguKristu, sitshele. Wathi kubo: Uma nginitshela, anisoze nakholwa;

₆₈noma ngibuza, anisoze naphendula.

₆₉Kepha kusukela manje iNdodana yomuntu izakuhlala ngakwesokunene samandla kaNkulunkulu.

₇₀Base bethi bonke: Kanti uyiNdodana kaNkulunkulu na? Wathi kubo: Nisho khona, ngokuba ngiyiyo.

₇₁Bathi: Pho, sisaswele-bufakazi na? Ngokuba sesizwile uqobo lwethu ngomlomo wakhe.