UJOBE 23

₂Nanamuhla ukukhala kwami kumunyu;

isandla sami siyasinda ngokububula kwami.

₃Sengathi ngingazi ukuthi ngiyakumtholaphi,

ngize ngifike endlini yakhe,

₄ngilungise ukwahlulelwa kwami phambi kwakhe,

ngigcwalise umlomo wami ngezimpendulo.

₅Bengiyakuwazi amazwi abeyakungiphendula ngawo,

ngiqonde ukuthi ubeyakuthini kimi.

₆Ubeyakuphikisana nami ngamandla akhe amakhulu na?

Cha, ubeyakubhekisa kimi.

₇Lapho olungileyo ubeyakuphikisana naye,

mina ngikhululwe kumahluleli wami kuze kube-phakade.

₈Kodwa bheka, ngiya empumalanga, kepha akakho,

nasentshonalanga, kepha angimboni,

₉nangasenyakatho ekusebenzeni kwakhe, kepha akabonwa;

ujikela ngaseningizimu, kepha akabonakali.

₁₀Ngokuba uyayazi indlela yami;

esengivivinyile, ngiyakuphuma njengegolide.

₁₁Unyawo lwami lunamathele ezinyathelweni zakhe;

ngigcinile indlela yakhe, angiphambukanga.

₁₂Angichezukanga emyalweni wezindebe zakhe;

ngizibekele amazwi akhe kunezimiso zami.

₁₃Kodwa uyinto inye, ngubani ongambuyisa na?

Okufisayo umphefumulo wakhe, lokho uyakwenza.

₁₄Uyakufeza engikumiselweyo;

izinto eziningi ezinjalo zikuye.

₁₅Ngalokho ngishaywa luvalo ebusweni bakhe;

lapho ngikuqaphela, ngiyamesaba.

₁₆NguNkulunkulu odangalisileyo inhliziyo yami,

uSomandla ungethusile,

₁₇ngokuba anginqunywanga, bungakafiki ubumnyama;

wangifihlela ukuhlwa.