UJEREMIYA 16

₁Izwi likaJehova lafika kimi, lathi:

₂Awuyikuzithathela umfazi, ungabi-namadodana namadodakazi kulendawo.

₃Ngokuba usho kanje uJehova ngamadodana nangamadodakazi azalwa kulendawo, nangawonina abawabelethayo, nangawoyise abawazalayo kulelizwe, uthi:

₄Bayakuba-nokufa okwesabekayo, abayikulilelwa, abayikumbelwa; bayakuba-ngumquba emhlabathini, baqedwe ngenkemba nangendlala, izidumbu zabo zibe-ngukudla kwezinyoni zezulu nokwezilwane zasemhlabeni.

₅Ngokuba usho kanje uJehova, uthi: Ungangeni endlini yesililo, ungayi ukulila, ungabakhaleli, ngokuba ngikususile ukuthula kwami kulababantu, usho uJehova, kanye nomusa nobumnene.

₆Abakhulu nabancane bayakufela kulelizwe, abayikumbelwa, abayikulilelwa; abantu abayikuzisika, abayikuziphucula ngenxa yabo;

₇abayikubahlephulela isinkwa sokulila ukuba babaduduze ngabafileyo, bangabaphuzisi indebe yokududuza ngoyise nangonina.

₈Awuyikungena endlini yedili ukuba uhlale nabo, udle, uphuze.

₉Ngokuba usho kanje uJehova-Sebawoti, uNkulunkulu kaIsrayeli, uthi: Bheka, ngiyakulenza ukuba liphele kulendawo phambi kwamehlo enu nasezinsukwini zenu izwi lokujabula nezwi lokuthokoza, izwi lomyeni nezwi lomakoti.

₁₀Kuyakuthi lapho ubatshela lababantu onke lawamazwi, basho kuwe ukuthi: UJehova ukhulumeleni phezu kwethu konke lokhu okubi na? Ububi bethu buyini? Yisiphi isono esoné ngaso kuJehova uNkulunkulu wethu na?

₁₁Usuyakusho kubo ukuthi: Ngenxa yokuba oyihlo bangishiyile, usho uJehova, balandela abanye onkulunkulu, babakhonza, bakhuleka kubo, bangishiya, abagcinanga umthetho wami,

₁₂nani nenza okubi kunawoyihlo, ngokuba bhekani, niyalandela, kube-yilowo nalowo inkani yenhliziyo yakhe embi, ningangilaleli,

₁₃ngalokho ngiyakunizwiba nisuke kulelizwe, niye ezweni eningalaziyo, nina nawoyihlo; niyakukhonza khona abanye onkulunkulu imini nobusuku, ngokuba angiyikuniphatha ngesihe.

₁₄Ngalokho bheka, izinsuku ziyeza, lapho kungasayikuthiwa: Kuphila kukaJehova owabakhuphula abantwana bakwaIsrayeli ezweni laseGibithe,

₁₅kepha: Kuphila kukaJehova owabakhuphula abantwana bakwaIsrayeli ezweni lasenyakatho nasemazweni onke lapho ebebaxoshele khona; kepha ngiyakubabuyisela ezweni lakubo engalinika oyise.

₁₆Bheka, ngiyakuthumela kubadobi abaningi, usho uJehova, babadobe; besengithumela kubazingeli abaningi, babazingele kuzo zonke izintaba, nakuwo onke amagquma, nakuyo imifantu yeziwa.

₁₇Ngokuba amehlo ami akuzo zonke izindlela zabo; abasithele ebusweni bami, nobubi babo abufihlekile emehlweni ami.

₁₈Kuqala ngiyakuphindisela ngokuphindiweyo ububi babo nezono zabo, ngokuba balingcolisile izwe lami ngezidumbu zezinto zabo ezizondekayo, baligcwalisa ifa lami ngezinengiso zabo.