UISAYA 56

₁Usho kanje uJehova, uthi: Gcinani ukwahlulela, nenze ukulunga,

ngokuba insindiso yami iseduze ukuba ifike,

nokulunga kwami ukuba kwambulwe.

₂Ubusisiwe umuntu owenza lokhu,

nendodana yomuntu ebambelela kukho,

ogcina isabatha engaloni,

osibamba isandla sakhe ukuba singenzi nakuphi okubi.

₃Indodana yowezizwe ezihlanganisé noJehova

mayingasho ukuthi:

Impela uJehova uyakungahlukanisa nabantu bakhe,

nomthenwa angathi:

Bheka, ngingumuthi owomileyo.

₄Ngokuba usho kanje uJehova ngabathenwa, uthi:

Abawagcina amasabatha ami, nabakhetha engikuthandayo,

nababambelela esivumelwaneni sami

₅bona ngiyakubanika endlini yami naphakathi kwezingange zami

isikhumbuzo negama elihle kunamadodana namadodakazi;

ngiyakubanika igama eliphakade, elingayikunqunywa.

₆Nabezizwe abazihlanganisa noJehova

ukumkhonza uJehova nokulithanda igama likaJehova

ukuba babe-yizinceku zakhe

bonke abaligcina isabatha, bangaloni,

nababambelela esivumelwaneni sami,

₇yebo, nabo ngiyakubayisa entabeni yami engcwele,

ngibathokozise endlini yami yokukhuleka;

iminikelo yabo yokushiswa nemihlatshelo yabo

iyakwamukeleka ealtare lami,

ngokuba indlu yami iyakubizwa ngokuthi indlu yokukhuleka

phakathi kwabantu bonke.

₈INkosi uJehova ebutha abaxoshiweyo bakwaIsrayeli ithi:

Ngisezakubuthela kuye nabanye

ngaphandle kwabase bebuthiwe.

₉Nonke nina-zilwane zasendle, wozani nidle,

nonke nina-zilwane zasehlathini.

₁₀Bonke abalindi bayizimpumputhe,

abanakwazi;

bonke bayizinja eziyizimungulu,

abakwazi ukukhonkotha,

balala bephupha,

bathanda ukozela.

₁₁Yebo, bayizinja ezihahayo,

abakwazi ukusutha;

yebo, laba bangabelusi abangenakuqonda,

baphendukela bonke ezindleleni zabo,

kube-yilowo nalowo enzuzweni yakhe, bonke kanyekanye.

₁₂Wozani, ngiyakuletha iwayini,

sizakuzigcwalisa ngophuzo olunamandla;

nengomuso liyakuba-njenganamuhla,

libe-likhulu kakhulu.