UISAYA 3

₁Ngokuba bheka, iNkosi uJehova-Sebawoti

iyasusa eJerusalema nakwaJuda uzime nodondolo,

lonke uzime lwesinkwa

nalo lonke uzime lwamanzi:

₂amaqhawe namadoda empi,

abahluleli nabaprofethi,

ababhuli namalunga,

₃izinduna zamashumi ayisihlanu nabantu abanodumo,

abeluleki nezingcweti ezihlakaniphileyo,

nabanolwazi lokulumba.

₄Ngiyakubanika abafana babe-yizikhulu zabo,

nezingane ziyakubabusa.

₅Abantu bayakucindezelana, kube-yilowo nalowo,

yebo, yilowo nalowo nomakhelwane wakhe;

abantwana bayakubhensela abadala,

nabadelelekileyo abanodumo.

₆Lapho umuntu eyakubamba umfowabo

endlini kayise ethi:

Wena unengubo, yiba-ngumbusi wethu,

lencithakalo ibe-phansi kwesandla sakho,

₇ngalona lolosuku uyakudazuluka athi:

Angiyikuba-ngumelaphi,

ngokuba endlini yami akukho-sinkwa, akukho-ngubo;

ningangibeki umbusi wabantu.

₈Ngokuba iJerusalema likhubekile,

noJuda uwile,

lokhu izilimi zabo nezenzo zabo ziphambene noJehova

ukucunula amehlo enkazimulo yakhe.

₉Ukukhetha kwabo ubuso kuyafakaza ngabo;

benza izono zabo obala njengeSodoma, abazifihli.

Maye kuyo imiphefumulo yabo!

Ngokuba bazenzele okubi.

₁₀Yishoni kolungileyo ukuthi kuyakubakuhle kuye,

ngokuba bayakudla izithelo zezenzo zabo.

₁₁Maye komubi! Kuyakuba-kubi kuye,

ngokuba uyakubuyiselwa izenzo zezandla zakhe.

₁₂Abantu bami-ke-izingane ziyabacindezela,

nabesifazane bayababusa.

O bantu bami, abaniholayo bayanidukisa;

bachitha indlela yemikhondo yakho.

₁₃UJehova usesukumile ukuyokulwa,

umi ukuthetha amacala ezizwe.

₁₄UJehova uyakungena ekwahluleleni

namalunga abantu bakhe nezikhulu zabo ngokuthi:

Yinina eniqedile isivini,

impango yabampofu isezindlini zenu.

₁₅Nichobozeleni abantu bami,

nigaye ubuso babampofu, na?

isho iNkosi uJehova-Sebawoti.

Ngenxa yokuba amadodakazi aseSiyoni eziphakamisa,

ehamba elula izintamo, eqhikiza amehlo,

ehamba ecokama ekuhambeni kwawo,

ekhenceza ngezinyawo zawo,

₁₇ngalokho iNkosi iyakuzenza izimpandla izinkakhayi zamadodakazi aseSiyoni,

uJehova awanqunise.

₁₈Ngalolosuku iNkosi iyakususa imihlobiso yawo: izigqizo, nemiqhele, nezimbedu ezinjengenyanga,

₁₉neziqhaza, namasongo, nezimvakazi,

₂₀nezigqoko, nemihlobiso yemilenze,

nezibhamba, nemifuma, neziqu,

₂₁nezindandatho, namacici ekhala,

₂₂nezambatho zemikhosi, nezangaphezulu, namatshali*, nezinqalathi,

₂₃nezibuko, nelineni elicolekileyo, nemishuqulo, nezilembu.

₂₄Kuyakuthi esikhundleni samakha kube-ngukubola,

nasesikhundleni sebhande* igoda,

nasesikhundleni sezinwele ezilungisiweyo impandla,

nasesikhundleni sesidiya isibhamba sendwangu yamasaka,

nasesikhundleni sobuhle isishada.

₂₅Amadoda akho ayakuwa ngenkemba

namaqhawe akho ngokulwa.

₂₆Amasango alo ayakukhala, alile;

liyakuba-yize, lihlale emhlabathini.