Imivuzo yabapristi
1Abapristi bamaLevi, yebo, sonke isizwe sakwaLevi asiyikuba-nasabelo nafa kanye noIsrayeli; siyakudla iminikelo yomlilo kaJehova nefa lakhe.
2Asiyikuba-nafa phakathi kwabafowabo; uJehova uyifa laso, njengalokho ekhulumile kuso.
3Lokhu kuyakuba-yimfanelo yabapristi ephuma kubantu abanikela ngomhlatshelo, noma inkomo noma imvu, ukuba bamnike umpristi umkhono, nemihlathi yombili, nenanzi.
4Ulibo lwamabele akho, nolwewayini lakho, nolwamafutha akho, nezandulela zoboya bezimvu zakho uyakumnika khona.
5Ngokuba uJehova uNkulunkulu wakho umkhethile kuzo zonke izizwe zakho ukuba eme, akhonze egameni likaJehova, yena namadodana akhe, kuze kube-phakade.
6Uma umLevi evela noma kuliphi isango kwaIsrayeli wonke, lapho egogobele khona, afike ngaso sonke isifiso somphefumulo wakhe endaweni uJehova ayakuyikhetha,
7uyakukhonza egameni likaJehova uNkulunkulu wakhe njengokwenza kwabo bonke abafowabo amaLevi emiyo khona phambi kukaJehova.
8Ayakuphiwa izabelo ezilingeneyo ngaphandle kwalokho okuvela ngokuthengisa ngefa likayise.
Ukubhula kwabezizwe nabaprofethi bamanga
9Nxa usufiké ezweni uJehova uNkulunkulu wakho akunika lona, awuyikufunda ukwenza izinengiso zalezozizwe.
10Makungafunyanwa kuwe umuntu odabulisa indodana yakhe noma indodakazi yakhe emlilweni, noma umbhuli, noma ohlola imihlola, noma owenza imilingo, noma umlumbi,
11noma owenza iziphonso, noma obhula emadlozini, noma umthakathi, noma umlozikazana.
12Ngokuba yilowo nalowo ozenza lezizinto uyisinengiso kuJehova; ngenxa yalezizinengiso uJehova uNkulunkulu wakho uyabaxosha phambi kwakho.
13Mawuphelele kuJehova uNkulunkulu wakho.
14Ngokuba lezizizwe oyakuzidla ziyabalalela abahlola imihlola nabanamadlozi; kepha wena uJehova uNkulunkulu wakho akakuvumelanga ukwenza kanjalo.
15UJehova uNkulunkulu wakho uyakukuvusela umprofethi phakathi kwakho kubafowenu onjengami; nimlalele yena
16njengakho konke owakufisa kuJehova uNkulunkulu wakho eHorebe ngosuku lomhlangano ngokuthi: Mangingabe ngisalizwa izwi likaJehova uNkulunkulu wami, ngingabe ngisawubona lomlilo omkhulu futhi, funa ngife.
17UJehova wayesethi kimi: Basho kahle lokho abakukhulumile.
18Ngiyakubavusela umprofethi onjengawe phakathi kwabafowabo, ngibeke amazwi ami emlonyeni wakhe, akhulume kubo konke engimyala ngakho.
19Kuyakuthi yilowo nalowo ongayikulalela amazwi ami ayakuwakhuluma egameni lami, mina ngikufune kuye.
20Kepha umprofethi oyakukhuluma izwi ngokuziqhenya egameni lami engingamyalanga ukulikhuluma, noma ekhuluma egameni labanye onkulunkulu, lowomprofethi uyakufa.
21Uma uthi enhliziyweni yakho: Singalazi kanjani izwi uJehova angalikhulumanga na?
22yazi-ke ukuthi lokhu umprofethi akukhulumayo egameni likaJehova, beseyingenzeki leyonto, ingaveli yiyo leyonto, akusiye uJehova oyikhulumile; umprofethi uyikhulumile ngokuziqhenya; ungamesabi.
