AMAKHOSI I 9

₁Kwathi uSolomoni eseqedile ukwakha indlu kaJehova, nendlu yenkosi, nakho konke ukufisa kukaSolomoni ayefuné ukukwenza,

₂uJehova wabonakala kuSolomoni ngokwesibili, njengalokho ayebonakele kuye eGibeyoni.

₃UJehova wathi kuye: Ngiwuzwile umkhuleko wakho nokunxusa kwakho onxusé ngakho phambi kwami; ngiyingcwelisile lendlu oyakhileyo ukuba ngibeke khona igama lami kuze kube-phakade; amehlo ami nenhliziyo yami kuyakuba-khona izinsuku zonke.

₄Wena-ke, uma uyakuhamba phambi kwami njengokuhamba kukaDavide uyihlo, ngenhliziyo engenacala nangobuqotho, ukuba wenze konke engikuyalé ngakho, ugcine izimiso zami nezahlulelo zami,

₅ngiyakusimisa isihlalo sobukhosi sombuso wakho kwaIsrayeli kuze kube-phakade, njengalokho ngasho kuDavide uyihlo ukuthi: Akuyikunqunywa-muntu kuwe esihlalweni sobukhosi sakwaIsrayeli.

₆Kodwa uma nibuya ekungilandeleni, nina noma abantwana benu, ningagcini imiyalo yami nezimiso zami engikubeké phambi kwenu, kepha nihambe nikhonze abanye onkulunkulu, nikhuleke kubo,

₇ngiyakumnquma uIsrayeli ezweni engimniké lona; nalendlu engiyingcwelisele igama lami ngiyakuyilahla ebusweni bami, uIsrayeli abe-yisaga nesifenqo phakathi kwabantu bonke.

₈Noma lendlu iphakeme kangaka, bonke abadlula kuyo bayakumangala, bancimfe, bathi: UJehova wenzeleni kanje kulelizwe nakulendlu na?

₉Bayakuphendula ngokuthi: Kungokuba bamshiya uJehova uNkulunkulu wabo owakhipha oyise ezweni laseGibithe, banamathela kwabanye onkulunkulu, bakhuleka kubo, babakhonza; ngalokho uJehova ubehlisele konke lokho okubi.

₁₀Kwathi ngasekupheleni kweminyaka engamashumi amabili uSolomoni akhé ngayo izindlu zombili, indlu kaJehova nendlu yenkosi,

₁₁uHiramu inkosi yaseTire owayemsizile uSolomoni ngemisedari* nangemisayipuresi* nangegolide njengokufisa kwakhe konke wanikwa yinkosi uSolomoni imizi engamashumi amabili ezweni laseGalile.

₁₂UHiramu waphuma eTire ukuyobona imizi uSolomoni amniké yona, ayimthokozisanga.

₁₃Wathi: Iyini lemizi onginiké yona, mfowethu, na? Wayibiza ngokuthi izwe laseKabuli* kuze kube-namuhla.

₁₄UHiramu wayesethuma enkosini amatalenta* ayikhulu namashumi amabili egolide.

₁₅Indaba yezisebenzi ezabizwa yinkosi uSolomoni ukwakha indlu kaJehova, nendlu yakhe, neMilo, nogange lwaseJerusalema, neHasori, neMegido, neGezeri inje:

₁₆uFaro inkosi yaseGibithe wayenyukile wathatha iGezeri, walishisa ngomlilo, wabulala amaKhanani ayehlezi emzini, walinika umkaSolomoni indodakazi yakhe, libe-yisipho sakhe.

₁₇USolomoni wakha iGezeri neBeti-Horoni laseNzansi,

₁₈neBalati, neTamari lasehlane lalelozwe,

₁₉nayo yonke imizi yokubekelela uSolomoni ayenayo, nemizi yezinqola zakhe, nemizi yabamahashi bakhe, nalokhu uSolomoni ayefisa ukwakha khona eJerusalema, naseLebanoni, nasezweni lonke lapho ebusa khona.

₂₀Abantu bonke abaseleyo kuma-Amori, namaHeti, namaPherizi, namaHivi, namaJebusi, abangesibo abantwana bakwaIsrayeli,

₂₁abantwana babo abasala ezweni emva kwabo, abantwana bakwaIsrayeli ababengenamandla okubaqeda, kubona uSolomoni wabiza izisebenzi eziyizigqila kuze kube-namuhla.

₂₂Kodwa kubantwana bakwaIsrayeli uSolomoni akakhiphanga izigqila ngokuba bona babengamadoda empi, nezinceku zakhe, nezikhulu zakhe, nezinduna zakhe, nabaphathi bezinqola zakhe, nabamahashi bakhe.

₂₃Izinduna ezinkulu ezaziphethe umsebenzi kaSolomoni zazingamakhulu ayisihlanu namashumi ayisihlanu; zaziphethe abantu ababesebenza emsebenzini.

₂₄Kodwa indodakazi kaFaro yenyuka emzini kaDavide, yaya endlini yayo ayakhele yona; wayeselakha iMilo.

₂₅Kathathu ngomnyaka uSolomoni wanikela ngeminikelo yokushiswa nangeminikelo yokuthula ealtare ayelakhele uJehova, eshisa impepho kanye nayo phambi kukaJehova. Wayeseyiqedile indlu.

₂₆Inkosi uSolomoni yenza imikhumbi e-Esiyoni-Geberi elingaseceleni kwe-Eloti ogwini loLwandle oluBomvu ezweni lakwaEdomi.

₂₇UHiramu wathuma ngalemikhumbi izinceku zakhe, amadoda emikhumbi ayelwazi ulwandle, kanye nezinceku zikaSolomoni.

₂₈Zafika eOfiri, zalanda khona igolide, amatalenta* angamakhulu amane namashumi amabili, zaliletha enkosini uSolomoni.