I KWABASEKORINTE 12

₁Kepha maqondana neziphiwo zokomoya angithandi, bazalwane, ukuba ningabi-nakwazi.

₂Niyazi ukuthi nisengabezizwe naholekela kuzo izithombe eziyizimungulu, nakuba naholwa kanjalo.

₃Ngakho ngiyanazisa ukuthi: Akukho-muntu okhuluma ngoMoya kaNkulunkulu ongathi: Kathukwe uJesu; futhi akukho-muntu ongathi: UJesu uyiNkosi, kuphela ngaye uMoya oNgcwele.

₄Kepha kukhona iziphiwo zomusa ezahlukeneyo, kepha nguye lowoMoya.

₅Kukhona izinkonzo ezahlukeneyo, kepha yiyo leyoNkosi.

₆Kukhona imisebenzi yamandla eyahlukeneyo, kepha nguye lowoNkulunkulu osebenza konke kubo bonke.

₇Kepha yilowo nalowo uphiwa okubonakalisa uMoya kube-ngokokusiza.

₈Ngokuba omunye uphiwa ngoMoya izwi lokuhlakanipha, kepha omunye izwi lokwazi ngaye lowoMoya,

₉omunye ukukholwa kuye lowoMoya, omunye iziphiwo zokuphulukisa kuye uMoya munye,

₁₀omunye ukwenza imisebenzi yamandla, omunye ukuprofetha, omunye ukwahlukanisa omoya, omunye ukukhuluma izilimi ngezilimi, omunye ukuhumusha izilimi.

₁₁Kepha konke lokho kusetshenzwa nguyena lowoMoya munye, ebabela yilowo nalowo ngokwakhe njengokuthanda kwakhe.

₁₂Ngokuba njengomzimba umunye, kepha unezitho eziningi, nezitho zonke zomzimba, nokuba ziziningi, zingumzimba munye, unjalo-ke noKristu.

₁₃Ngokuba ngaMoya munye thina sonke sabhapathizwa sibe-mzimba munye, noma singabaJuda noma singamaGreki, noma siyizigqila noma singabakhululekileyo; thina sonke saphuziswaMoya munye.

₁₄Ngokuba umzimba awusiso isitho sinye kodwa eziningi.

₁₅Uma unyawo luthi: Lokhu ngingesiso isandla, angisikho okomzimba, nokho luyikho okomzimba.

₁₆Noma indlebe ithi: Lokhu ngingesilo iso, angisikho okomzimba, nokho iyikho okomzimba.

₁₇Uma umzimba wonke ubuyiso, ukuzwa ngabe kuphi na? Uma wonke ubungukuzwa, ukunuka ngabe kuphi na?

₁₈Kepha kalokhu uNkulunkulu umisile izitho zonke, yileso naleso emzimbeni ngokuthanda kwakhe.

₁₉Uma kambe zonke ziyisitho sinye, umzimba ngabe uphi na?

₂₀Kepha kalokhu izitho ziningi, kodwa umzimba munye.

₂₁Iso alinakusho esandleni ukuthi: Angikudingi; nekhanda futhi alinakusho ezinyaweni ukuthi: Anginidingi.

₂₂Kanti ngempela lezozitho zomzimba ezingathi zibuthakathaka kunezinye ziyadingeka;

₂₃nalezozitho zomzimba ezingathi zidelelekile kunezinye, yizona esizazisa kakhulu; nalezo esinamahloni ngazo zihlonipheka kakhulu.

₂₄Kanti lezo ezinesimo esihle azikudingi lokho. Kepha uNkulunkulu wawuhlanganisa umzimba, enika esidelelekileyo udumo olukhulu kakhulu,

₂₅ukuze kungabikho ukwahlukana emzimbeni, kepha izitho zonke zinakekelane ngokufanayo.

₂₆Uma kuhlupheka isitho sinye, kuhlupheka izitho zonke kanye naso; uma kudunyiswa isitho sinye, kujabula izitho zonke kanye naso.

₂₇Kepha nina ningumzimba kaKristu nezitho ngabanye.

₂₈UNkulunkulu umisile abathile ebandleni, kuqala abaphostoli, okwesibili abaprofethi, okwesithathu abafundisi, besekuba-yimisebenzi yamandla, besekuba-yiziphiwo zomusa zokuphulukisa, nokusiza, nokubusa, nezilimi ngezilimi.

₂₉Bonke bangabaphostoli na? Bonke bangabaprofethi na? Bonke bangabafundisi na? Bonke bangabenza imisebenzi yamandla na?

₃₀Bonke baneziphiwo zomusa zokuphulukisa na? Bonke bakhuluma ngezilimi na? Bonke bayahumusha na?

₃₁Kepha zondelelani iziphiwo ezinkulu.

Kanti senginikhombisa indlela eyona iyinhle kakhulu.