UZakhariya 6

₁Ngabuye ngabheka, ngabona kuphuma izinqola ezine phakathi kwezintaba ezimbili; kwakuyizintaba zethusi. ₂Enqoleni yokuqala kwakukhona amahhashi abomvu, kweyesibili kunamnyama, ₃kweyesithathu kunamhlophe, bese kuthi enqoleni yesine kube ngamahwaqahwaqa. ₄Ngase ngiyibuza ingelosi eyayikhuluma nami, ngithi: “Kuyini lokhu mnumzane?”

₅Ingelosi yaphendula, yathi: “Lena yimimoya emine yezulu ephumile, ibime phambi koMnuzane womhlaba wonke. ₆Leyo enamahhashi amnyama ilibhekise enyakatho; amhlophe ayawalandela; amahwaqahwaqa aya eningizimu.”

₇Lawa anamandla aphumayo, afuna ukuhamba emhlabeni wonke. Yayisithi: “Hambani, nihambe emhlabeni wonke.”

Ayesehamba kuwo wonke umhlaba. ₈Yayisibiza, yakhuluma nami, yathi: “Uyabona-ke, lawa alibhekise enyakatho, ayakuthulisa uMoya wami enyakatho.”

₉Kwase kufika kimi izwi likaSimakade, lathi, ₁₀“Thatha izipho kubathunjwa, kuHelidayi, kuThobiya, nakuJedaya, uhambe ngalo lolo lusuku, uye endlini kaJosiya indodana kaZefaniya, kulapho befikele khona bevela eBhabhele. ₁₁Uyakuthatha isiliva negolide, wenze ngakho umqhele, uwubeke ekhanda likaJoshuwa indodana kaJehosadakhi, umphristi omkhulu. ₁₂Uyakuthi kuye: ‘Usho kanje uSimakade Wamabandla, uthi: Bheka, kukhona indoda egama layo nguHlumela; uyakumila endaweni yakhe, akhe ithempeli likaSimakade. ₁₃Impela nguyena oyokwakha ithempeli likaSimakade, athwale ubukhosi, ahlale, abuse esihlalweni sakhe sobukhosi, kube khona nomphristi esihlalweni sakhe sobukhosi, kube nokululekana ngokuthula phakathi kwabo bobabili.’ ₁₄Umqhele uyakuba ngokaHelemi, uThobiya, uJedaya, uHeni, indodana kaZefaniya, kube yisikhumbuzo ethempelini likaSimakade. ₁₅Labo abaphuma kude bayakufika, bakhe ithempeli likaSimakade, niyakukwazi ukuthi nguSimakade Wamabandla ongithumile kini. Lokhu kuyakwenzeka, uma impela nililalela izwi likaSimakade uNkulunkulu wenu.”