Endlini KaRaguweli
1Lapho bengena e-Ekbhathana uThobiyase wathi kuye: “Mfowethu Azariya, ngiphuthumise emzini womfowethu uRaguweli.”
Ngakho wamthatha wamusa endlini kaRaguweli, lapho bamfumana khona ehlezi ekungeneni kweguma. Bambingelela kuqala, waphendula wathi: “Kuyintokozo ukunibona, bafowethu; niyemukeleka, impilo enhle!” Wase ebangenisa endlini yakhe. 2Wathi kumkakhe u-Edna: “Maye ukufana kwale nsizwa nomfowethu uTobiti!”
3U-Edna wababuza wathi: “Nivelaphi nina, bafowethu na?” Baphendula bathi kuye, “thina singabolibo lukaNafethali olusekuthunjweni eNineve.”
4Wayesethi kubo: “Niyamazi umfowethu uTobiti na?” Baphendula bathi: “Yebo, siyamazi.”
5Wayesebuza ethi: “Usaphila yini na?”
Bathi: “Uyaphila futhi uphile kahle.” UThobiyase wathi: “Ngubaba lowo.”
6Ekuzwa lokho uRaguweli wagxuma, wamanga, wakhala. Wabuye wakhuluma wathi: “Mawubusiswe, ndodana yendoda elungile nehloniphekile! Kwaze kwayinto embi kakhulu ukuthi indoda elunge nemnene kangaka seyaba yimpumputhe!”
Wase emgona umhlobo wakhe uThobiyase wakhala. 7Umkakhe u-Edna naye wamkhalela, kanjalo nendodakazi yabo uSara yakhala. 8Wayesebahlabisa ingqama emhlambini wakhe wabemukela ngokuthokomala. 9Lapho sebegezile bazihlanza, bahlala ukuba badle, uThobiyase wayesethi kuRafayeli: “Mfowethu Azariya, mcele uRaguweli ukuba anginike udadewethu uSara.”
10URaguweli wezwa wayesethi kuThobiyase: “Yidla, uphuze, ujabule kulobu busuku. Ngokuba akukho ndoda enye ngaphandle kwakho enelungelo lokuganwa yindodakazi yami uSara, mfowethu, futhi anginalungelo lokuba ngimnike enye indoda ngaphandle kwakho, ngokuba wena uyisihlobo esisondele, kodwa ake ngikuchazele sonke isimo, mntanami. 11Sengike ngamganisela amadoda aze aba yisikhombisa ayizihlobo zami, kodwa onke afa ngobusuku angena kuye ngabo. Ngakho-ke mntanami, dlana uphuze iNkosi iyokwenza lokho okunifanele.”
12Kepha uThobiyase wathi: “Anginakudla futhi ngiphuze utho uze uhlaziye okuqondene nami.”
Ngakho-ke uRaguweli wathi kuye: “Ngizakukwenza lokho. Ungowakho njengokumisiwe encwadini kaMose, futhi kumisiwe nasemazulwini ukuthi ufanele anikwe wena. Mthathe udadewenu kusukela manje, ungumfowabo, yena ungudadewenu. Ngimnikela kuwe kusukela namuhla kuze kube phakade. INkosi yezulu, mntanami, mayiniqondise iniphumelelise nobabili kulobu busuku, inenzele umusa nokuthula.”
13URaguweli wayesebiza indodakazi yakhe uSara, lapho isifikile, wathatha isandla sayo wasinikeza uThobiyase ethi: “Mthathe abe ngumkakho ngokomthetho nangokwahlulela njengoba kulotshiwe encwadini kaMose. Mthathe uze ufike naye niphephile endlini kayihlo. Sengathi uNkulunkulu wezulu anganiphumelelisa endleleni ngokuthula kwakhe.”
Umgcagco KaThobiyase NoSara
14Wayesebiza unina wamtshela ukuba alethe okokubhala; wayesebhala isivumelwano somshado, esasichaza ukuthi bamnikele kuye njengomfazi njengokwesimiso somthetho kaMose. Base beqala ukudla nokuphuza. 15URaguweli wayesebiza umkakhe u-Edna wathi kuye: “Dadewethu, lungisa enye yezindlu bese umthatha umusa kuyo.”
16Wahamba walungisa umbhede endlini njengokuba ayeyaliwe, wamletha uSara kuyo. Wayikhalela indodakazi yakhe wayesesula izinyembezi wathi kuyo: 17“Yima isibindi, ndodakazi yami; iNkosi yezulu ikuphe intokozo esikhundleni sosizi. Yima isibindi, ndodakazi yami.”
Wayesephuma.
