USirakhi 32

₁Uma bekwenza ube ngumphathi womcimbi, ungaziphakamisi; yiba yingxenye yabo bonke abamenyiwe. Nakekela bona kuqala ngaphambi kokuba uhlale phansi; ₂lapho usuwufezile wonke umsebenzi wakho, thatha indawo yakho phakathi kwabo ukuze ujabule kanye nabo uze uthole umqhele ngenxa yobuholi bakho obuhle. ₃Khulumani, nina enibadala ngokuba kuyilungelo lenu, kodwa akube ngolwazi olushaya emhlolweni, futhi ningawuphazamisi umculo. ₄Lapho kuthokozwa khona, ungakhulumeli futhi; ungalweli ukuveza ubuhlakani bakho ngesikhathi okungesona esifanelekile.

₅Lapho kuthokozwa khona ngewayini, umculo, ufana nesigxivizo serubhi emxhakeni wegolide. ₆Umkenenezo womculo ohambisana newayini ufana nobuhle be-emeraldi phakathi kwengcebo yegolide. ₇Khulumani, nina enisebasha, uma kufanele ukuba nenze njalo, kodwa khulumani kungadluli kokubili, futhi nakhona uma ubuziwe. ₈Yiba mfishane, usho okuningi usebenzisa amazwi ambalwa; yiba njengonolwazi kodwa okwaziyo ukuzibamba. ₉Uma uphakathi kwabakhulu ungazenzi olingana nabo; nalapho omunye ekhuluma unganyenyezi.

₁₀Umbani wendulela ukuduma kwezulu, kanjalo nokwamukelwa kwendulela lowo ozehlisayo. ₁₁Hamba ngesikhathi esifaneleyo, ungaze ube ngowokugcina; buyela ekhaya lakho, musa ukulokhu umningi lapho. ₁₂Zithokozise ujabule ngenhliziyo yakho, kodwa qaphela ukuba ungoni ngamazwi okuziphakamisa. ₁₃Kepha ngaphezu kwakho konke, mdumise uMdali wakho, okupha izipho zakhe ezinhle.

₁₄Omfunayo uNkulunkulu uyakwemukela ukuqondiswa nguye, nalabo abavuka ekuseni ukumfuna, bayowufumana umusa wakhe. ₁₅Lowo ofuna umthetho, uyogcwaliswa ngolwazi lwawo, kodwa umzenzisi, uyakuqhuzulwa yiwo. ₁₆Labo abamesabayo uSimakade benza izinqumo ezinhle, futhi bayakuba ngabaphembi bokuhle njengokukhanya. ₁₇Isoni siyakwedelela ukukhuzwa, silandela intando yaso. ₁₈Umuntu ohlakaniphile kayibukeli phansi imibono ehlakaniphile; kodwa isijaka esiziphakamisayo asethuswa yilutho.

₁₉Ungenzi lutho ngaphambi kokuba uxoxe nabanye, kodwa uma usuze wakwenza lokho ungazinyezi ngesinqumo sakho. ₂₀Ungayihambi indlela egcwele izingozi, futhi ungaqhuzulwa yinto eyodwa kuze kube kabili. ₂₁Ungazenzi owazi kakhulu ngoba ubona izinto ziqondile zihamba kahle, ₂₂futhi iqaphelisise indlela yakho. ₂₃Qaphela kukho konke okwenzayo, ngokuba lokhu kungukugcina imiyalo. ₂₄Lowo ogcina umthetho uzilonda yena, nalowo owethemba uSimakade kanakulahlekelwa lutho.