USirakhi 13

₁Othinta umule, uyakuba mnyama bhuqe futhi ozihlanganisa nozigqajayo uyokhula afane naye. ₂Ungazami ukuthwala umthwalo ongaphezu kwamandla akho, noma uzencikanise nomuntu ongaphezu kwakho okanye ocebile kunawe. Isitsha sebumba singaqhathaniswa kanjani nesensimbi na? Uma zishayisana ibumba liyakuphihlika. ₃Umuntu ocebileyo uyona bese eqhubekela phambili ngokwedelela; ompofu uyoniwa bese kulindeleka ukuba axolise. ₄Uma ocebileyo ekwazi ukukugqilaza ngaphandle kwenkokhelo kukhomba ukuthi unosizo kuye, kodwa kuthi lapho ususwele akulahlise okwenyongo yenyathi. ₅Uma umi kahle uyoba ngumngani wakho ozwakala ekhaleni, akuvove uze ube lugoqwana ngaphandle kokulahlwa unembeza. ₆Uma ekudinga uyokukuyenga ngenkohliso, abe ngokuthokozele nokugqugquzelayo, akhulume kahle athi: “Ngingakwenzelani?”, ₇akuthele ngamahloni ngokuhle akwenzela khona, akuvove uze ube lukhokhothi; kuthi isigcino akwenze inhlekisa. Emva kwalokho uma ekubona akwedlule sengathi kakwazi akunikinele ikhanda. ₈Qaphela ungadukiswa futhi uphoxeke lapho uthokozile.

₉Uma isikhulu sikumema, ungasheshi ukwemukela isimemo, size sikucindezele ekukumemeni. ₁₀Ungabi ngungqaphambili, funa uphoxeke, futhi ungemi wedwa funa ukhohlakale. ₁₁Ungazikhohlisi sengathi niyalingana noma ukhohliswe ingxoxo yakhe ende ngesikhathi ekhuluma, angakuyengi ngokukumamathekela kwakhe kanti uyakwela. ₁₂Banesihluku labo abangenasifuba ngeke bakuvikele ebubini nasemaketangweni. ₁₃Ungathululi isifuba sakho noma kubani hlala uqaphile ngoba uhamba engozini. ₁₄Uma uphupha ngalezi zinto vuka, mthande uNkulunkulu impilo yakho yonke umbize oyinsindiso yakho. ₁₅Zonke izinto eziphilayo zithanda okufana nazo, kanjalo nabantu. ₁₆Zonke izidalwa zihambisana nezifana nazo, kanjalo nabantu banamathele kwabajwayelene nabo.

₁₇Yini nje efanayo phakathi kwenkentshane newundlu, noma phakathi kwesoni nowesaba uNkulunkulu na? ₁₈Kuthula kuni okungaba khona phakathi kwempisi nenja, naphakathi kocebileyo nompofu na? ₁₉Njengoba amabhubesi edla izimbongolo zasendle kanjalo abacebileyo baphila ngabampofu. ₂₀Njengoba ukuzithoba kubenyanyisa abaphakeme kanjalo abacebileyo bayanengwa ngabampofu. ₂₁Uma ocebileyo ehamba entengantenga, uqiniswa ngabangani bakhe; ompofu uyawa, abangani bakhe bashaye sengathi abamazi. ₂₂Nxa ocebileyo eshelela baningi abaphuthuma ukumsiza; uma esho utho olubi bayamxolisela. Kodwa uma ompofu eshelela, uthola ukugxekwa; noma ngabe ukhuluma okunomqondo kalalelwa muntu. ₂₃Uma kukhuluma ocebileyo, bonke bayathula; bese bedumisa inkulumo yakhe. Uma ompofu ekhuluma bathi: “Ungubani yena lo?”

Uma ekhubeka bamdudulela phansi. ₂₄Ingcebo engangcolisiwe isono inhle, kepha ubuphofu bubi kuphela emehlweni abangalungile. ₂₅Inhliziyo iyabuguqula ubuso bomuntu ibenze bube buhle noma bube bubi. ₂₆Ubuso obuchachambile bukhombisa umuntu onenhliziyo enhle, kodwa ukuqamba izaga kudinga umqondo ojulileyo.