AMahubo 94

₁Nkulunkulu ophindiselelayo,

Simakade, Nkulunkulu ophindiselelayo, vela ukhanye.

₂Phakama, Mehluleli womhlaba,

uziphindisele kwabazidlayo izenzo zabo.

₃Simakade, kuyoze kube nini ababi,

kuyoze kube nini ababi bethaba na?

₄Bakhulumela futhi,

bakhuluma amagama ayiziswana,

bonke abenzi bokubi bayazigabisa.

₅Simakade, baphohloza isizwe sakho,

nefa lakho balinyathela phansi.

₆Babulala abafelokazi nabafokazi,

babulale nezintandane.

₇Bathi:

“USimakade akaboni,

uNkulunkulu kaJakobe akanaki.”

₈Qaphelani nina zithutha eziphakathi kwabantu,

nani ziwula, niyakuqonda nini na?

₉Owenza indlebe kanakuzwa na?

Owadala iso kanakubona na?

₁₀Othethisa abezizwe,

Yena ofundisa abantu ukwazi, kanakujezisa na?

₁₁USimakade uyayazi imicabango yabantu

ukuthi ingumoya nje.

₁₂Simakade, ubusisiwe umuntu omyalayo,

omfundisa ngomthetho wakho.

₁₃Umenza aphumule ezinsukwini ezimbi,

aze ambele umgodi lowo ongenamthetho.

₁₄Ngokuba uSimakade akayukubalahla abantu bakhe,

nefa lakhe akayukulishiya.

₁₅Ngokuba ukulunga kuyakubuyela ekwehluleleni,

bonke abaqotho ngenhliziyo bakulandele.

₁₆Ngubani oyakungimela phambi kwababi na?

Ngubani oyakungelekelela kwabenza okubi na?

₁₇Ukuba uSimakade ubengesilo usizo lwami,

umphefumulo wami ubuyakushesha

ukuhlala endaweni yabafileyo.

₁₈Lapho ngithi unyawo lwami lushibilikile,

umusa wakho, Simakade, wangiphasa.

₁₉Emicabangweni eminingi yenhliziyo yami,

ukududuza kwakho kuyawuthokozisa umphefumulo wami.

₂₀Isihlalo sobubi singahlanganyela yini nawe,

leso esisebenza okubi

kungathi kusemthethweni na?

₂₁Bahlangana ukuvukela umphefumulo wolungileyo,

balahla umuntu ongenacala ukuba afe.

₂₂Kepha uSimakade waba yinqaba yami,

uNkulunkulu wami waba yidwala engiphephela kulo.

₂₃Ukukhohlakala kwabo ukuphindisela kubo,

uyobaqeda nya ngobubi babo;

uSimakade uNkulunkulu wethu uyabaqeda.