AMahubo 83

₁Nkulunkulu, ungathuli, ungabi yisithulu,

ungali ukukhuluma, Nkulunkulu.

₂Ngokuba bheka, izitha zakho ziyaxokozela,

nabakuzondayo bayakuvukela.

₃Ngobuqili, benza uzungu ngabantu bakho,

baceba ukulwa nabafihliweyo bakho.

₄Bathi:

“Wozani sibaqothule,

bangabe besaba yisizwe,

negama lika-Israyeli lingabe lisakhunjulwa.”

₅Baceba nganhliziyonye,

benza isivumelwano ngawe:

₆amathende ka-Edomi aka-Ishmayeli,

akaMowabi nakaHagari,

₇noGebhali, u-Amoni, u-Amaleki,

iFilistiya nabakhile eThire.

₈Ne-Asiriya lahlangana nabo,

laba yingalo yabantwana bakaLothi. Sela

₉Yenza kubo njengakuMidiyani,

nakuSisera nakuJabhini ngasemfuleni iKishoni,

₁₀ababhubhela e-Eni Dori,

baba ngumquba emhlabathini.

₁₁Izikhulu zabo zenze

zibe njengo-Orebhi noZebhi,

nawo wonke amakhosana abo

abe njengoZebha noZalimuna

₁₂ababethi:

“Masizithathele amadlelo kaNkulunkulu.”

₁₃Nkulunkulu wami,

benze bafane nothuli lwesikhwishikazana,

bafane namakhoba emoyeni.

₁₄Njengomlilo oshisa ihlathi,

njengelangabi elithungela izintaba,

₁₅baxoshe kanjalo ngesivunguvungu sakho,

ubethuse ngesiphepho sakho.

₁₆Ubuso babo ubuthele ngehlazo,

baze bafune igama lakho, Simakade.

₁₇Mabahlazeke, baphele amandla

kuze kube phakade,

mabahluleke, babhubhe,

₁₈bazi ukuthi nguwe wedwa

ogama lakho linguSimakade,

ungoPhezukonke emhlabeni wonke.