AMahubo 46

₁UNkulunkulu uyisiphephelo sethu namandla ethu,

ufunyaniswa elusizo impela ekuhluphekeni.

₂Ngakho-ke angiyukwesaba nakuba umhlaba uguquka,

nezintaba zidilikela ekujuleni kolwandle,

₃nakuba amanzi alo ehlokoma, ekhephuzela,

nezintaba zizamazama ngokudlanga kwalo. Sela

₄Ukhona umfula omanzi awo athokozisa

umuzi kaNkulunkulu,

indlu engcwele yoPhezukonke.

₅UNkulunkulu uphakathi kwawo, awuyukuzanyazanyiswa,

uNkulunkulu uyakuwusiza ngovivi lokusa.

₆Izizwe ziyaxokozela, imibuso iyazamazama;

uphumisela izwi lakhe, umhlaba uncibilike.

₇USimakade Wamabandla unathi,

uNkulunkulu kaJakobe uyinqaba yethu. Sela

₈Wozani, nibone imisebenzi kaSimakade,

incithakalo ayehlisele emhlabeni.

₉Uqeda izimpi kuze kube

semikhawulweni yomhlaba,

wephula umnsalo,

anqume umkhonto,

izinqola zempi azishise ngomlilo.

₁₀Thulani, niqonde

ukuthi Mina nginguNkulunkulu,

ngiyakuphakama kwabezizwe,

ngiphakame emhlabeni.

₁₁USimakade Wamabandla unathi,

uNkulunkulu kaJakobe

uyinqaba yethu. Sela