AMahubo 29

₁Mnikeni udumo uSimakade,

nina zidalwa zezulu.

Mnikeni uSimakade udumo,

inkazimulo namandla.

₂Mnikeni uSimakade udumo olufanele igama lakhe,

mdumiseni uSimakade ebukhazikhazini bakhe obungcwele.

₃Izwi likaSimakade liphezu kwamanzi,

uNkulunkulu wenkazimulo uyaduma;

uSimakade uphezu kwamanzi amaningi.

₄Izwi likaSimakade linamandla.

Izwi likaSimakade liyinkazimulo.

₅Izwi likaSimakade lephula imisedari;

uSimakade uphoqoza imisedari eLebhanoni.

₆ILebhanoni alenze litshekule njengenkonyane,

neSiriyoni, njengethole lenyathi.

₇Izwi likaSimakade lidlalisela kugqamuke amalangabi.

₈Izwi likaSimakade lizamazamisa ihlane,

uSimakade unyakazisa ihlane;

uSimakade unyakazisa ihlane eKadeshi.

₉Izwi likaSimakade liphunzisa izimbabala;

liphundla amahlathi,

konke okusethempelini lakhe kuthi:

“Udumo!”

₁₀USimakade uhleli phezu kwezikhukhula,

uSimakade uyiNkosi,

ubusa kuze kube phakade.

₁₁USimakade uzokupha abantu bakhe amandla.

USimakade uzobusisa isizwe sakhe ngokuthula.