AMahubo 148

₁Haleluya!

Dumisani uSimakade ezulwini,

nimdumise kweliphezulu.

₂Mdumiseni nina zingelosi zakhe zonke,

nimdumise nina mabandla akhe wonke.

₃Mdumiseni nina langa nenyanga,

nimdumise nina zinkanyezi zonke ezikhanyayo.

₄Mdumiseni nina mazulu amazulu,

nina manzi aphezu kwezulu.

₅Konke makudumise igama likaSimakade,

ngokuba nguYena owayaleza, kwadaleka.

₆Wakumisa kwaze kwaba phakade naphakade,

wakushayela umthetho okungenakuweqa.

₇Mdumiseni uSimakade emhlabeni

nina mikhomo nezintwa zonke,

₈nawe mlilo nesichotho,

liqhwa nenkwezane,

nawe siphepho esenza okwezwi lakhe,

₉nani zintaba namagquma wonke,

nani mithi ethelayo,

nayo yonke imisedari,

₁₀nani zilwane nemfuyo yonke,

nani eninwabuzelayo

nezinyoni ezindizayo,

₁₁nani makhosi omhlaba nabantu bonke,

nani zikhulu nabehluleli bonke bomhlaba,

₁₂nani zinsizwa nezintombi,

nani maxhegu nabafana.

₁₃Manidumise igama likaSimakade,

ngokuba ngelakhe lodwa igama eliphakemeyo,

inkazimulo yakhe iphezu komhlaba nezulu.

₁₄Useluphakamisile udumo lwabantu bakhe,

ngalokho-ke abethembekileyo bakhe bayamdumisa,

abantu bakwa-Israyeli;

abantu abaseduze naye.

Haleluya!