AMahubo 118

₁Bongani uSimakade ngokuba muhle,

ngokuba umusa wakhe umi phakade.

₂Makathi u-Israyeli:

“Yebo, umusa wakhe umi phakade.”

₃Mayithi indlu ka-Aroni:

“Yebo, umusa wakhe umi phakade.”

₄Mabathi abamesabayo uSimakade:

“Yebo, umusa wakhe umi phakade.”

₅Osizini lwami ngakhuleka kuSimakade,

uSimakade wangiphendula,

wangihola endaweni ebanzi.

₆USimakade ungakimi, angiyukwesaba,

umuntu angangenzani na?

₇USimakade ungakimi ekanye nabangisizayo,

ngalokho ngiyakubabuka bephansi abangizondayo.

₈Kuhle ukuphephela kuSimakade kunokwethemba umuntu.

₉Kuhle ukuphephela kuSimakade, kunokwethemba izikhulu.

₁₀Zonke izizwe zingizungezile,

egameni likaSimakade ngizozibhubhisa.

₁₁Zingiphahlile, yebo, zingizungezile;

egameni likaSimakade ngizozibhubhisa.

₁₂Zingibunganyele njengezinyosi,

zizocinywa njengomlilo wameva;

egameni likaSimakade ngizozibhubhisa.

₁₃Ungihlohlolozile ukuze ngiwe,

kodwa uSimakade uyangisiza.

₁₄USimakade ungamandla ami,

nesihlabelelo sami,

ube yinsindiso yami.

₁₅Izwi lokwethaba nelokusindiswa lisemathendeni abaqotho,

isandla sokunene sikaSimakade sigile izimanga.

₁₆Esokunene sikaSimakade siphakeme,

esokunene sikaSimakade sisebenza ngamandla.

₁₇Angizukufa; ngizophila,

ngishumayele ngemisebenzi kaSimakade.

₁₈USimakade wangijezisa kanzima,

kodwa akanginikelanga ekufeni.

₁₉Ngivuleleni amasango okulunga,

ngingene ngawo,

ngimdumise uSimakade.

₂₀Yileli isango likaSimakade,

olungileyo uyakungena ngalo.

₂₁Ngiyakukudumisa,

ngokuba ungizwile,

ube yinsindiso yami.

₂₂Itshe abalinqabayo abakhi,

selaba yinhloko yegumbi.

₂₃Lona lavela kuSimakade,

liyisimangaliso emehlweni ethu.

₂₄Yilolu usuku alwenzileyo uSimakade,

siyakwethaba, sithokoze ngalo.

₂₅Sindisa, Simakade,

ngiyakuncenga!

Hlahlamelisa, Simakade,

ngiyakucela!

₂₆Makabusiswe ozayo egameni likaSimakade,

siyanibusisa sisendlini kaSimakade.

₂₇USimakade unguNkulunkulu, usikhanyisele,

hlobisani umkhosi ngamahlamvu,

kuze kube sezimpondweni ze-althare.

₂₈Wena unguNkulunkulu wami, ngiyakubonga,

Nkulunkulu wami, ngiyakuphakamisa.

₂₉Bongani uSimakade, ngokuba muhle,

ngokuba umusa wakhe umi phakade.