AMahubo 116

₁Ngiyamthanda uSimakade,

ngokuba uyalizwa izwi lokukhuleka kwami.

₂Ngokuba ubeke indlebe yakhe kimi,

ngizokhuleka kuye ngisaphila.

₃Izintambo zokufa zingithandele,

nobuhlungu bendawo yabafileyo bungibambile,

ngibhekene nosizi nezinhlupheko.

₄Ngase ngibiza igama likaSimakade, ngathi:

“Ngiyakuncenga, Simakade,

hlenga umphefumulo wami.”

₅USimakade unomusa, ulungile,

uNkulunkulu wethu unobubele.

₆USimakade uyamvikela ongenakuzisiza;

lapho ngithotshisiwe, Yena wangisindisa.

₇Buyela endaweni yakho yokuphumula,

mphefumulo wami,

ngokuba uSimakade ukuphathe ngomusa.

₈Impela uwuhlengile umphefumulo wami ekufeni,

namehlo ami, ezinyembezini,

nezinyawo zami, ekukhubekeni.

₉Ngizohamba phambi kukaSimakade ezweni labaphilayo.

₁₀Ngiyakholwa, yingakho ngathi:

“Ngihlushwe ngokweqile.”

₁₁Ngisosizini, ngathi:

“Bonke abantu banamanga.”

₁₂Ngiyakumnikani uSimakade

ngazo zonke izenzo zakhe ezinhle

angenzele zona na?

₁₃Ngiyophakamisa indebe yensindiso,

ngilibize igama likaSimakade.

₁₄Ngiyakufeza izithembiso zami kuSimakade,

yebo, naphambi kwabo bonke abantu bakhe.

₁₅Kuyigugu emehlweni kaSimakade,

ukufa kwabangcwele bakhe.

₁₆Impela ngiyinceku yakho Simakade,

ngiyinceku yakho,

indodana yencekukazi yakho,

uzikhumulile izintambo zami.

₁₇Ngiyakunikela kuwe umnikelo wokubonga,

ngibize igama likaSimakade.

₁₈Ngiyakufeza izithembiso zami kuSimakade,

yebo, naphambi kwabo bonke abantu bakhe,

₁₉emagcekeni endlu kaSimakade,

phakathi kwakho, Jerusalema.

Haleluya!