IZaga 20

₁Iwayini liyisedeleli,

uphuzo olunamandla lungumxokozeli;

bonke abadiyazeliswa yilo kabahlakaniphile.

₂Ulaka lwenkosi olwesabisayo lunjengokubhonga kwengonyama;

oyithukuthelisayo uyakulahlekelwa ngukuphila kwakhe.

₃Kuludumo kumuntu ukuziqhelelanisa nengxabano,

kodwa zonke iziwula ziyashesha ukuphikisana.

₄Ivila alilimi ngesikhathi sokulima;

lihamba lethekela ngesikhathi sokuvuna,

ngoba lingenalutho.

₅Amasu enhliziyweni yomuntu anjengamanzi ajulileyo;

umuntu onokuqonda uyakhelela.

₆Abantu abaningi bazishaya abalungileyo,

kodwa ngubani ongafumana umuntu

othembekileyo na?

₇Olungileyo uhamba ngobuqotho;

babusisiwe abantwana bakhe.

₈Inkosi ehlezi esihlalweni sokwehlulela,

ihlunga konke okubi ngamehlo ayo.

₉Ngubani ongasho athi:

“Ngiyigcinile inhliziyo yami ihlanzekile;

ngimsulwa ezonweni zami,” na?

₁₀Izisindo ezimbili

nama-efa amabili adukisayo,

kuyisinengiso kuSimakade.

₁₁Ngisho nomntwana waziwa ngezenzo zakhe

ukuthi akwenzayo kuhle noma kubi.

₁₂Indlebe ezwayo neso elibonayo,

kokubili kwenziwe nguSimakade.

₁₃Ungathandi ubuthongo, funa ube mpofu;

vula amehlo akho,

uyakusutha ngesinkwa.

₁₄“Kubi, kubi,”

kusho umthengi,

kepha esehambile uyazigabisa.

₁₅Kukhona igolide namarubhi amaningi,

kodwa izindebe ezinolwazi ziyigugu elinqabileyo.

₁₆Thatha ingubo yoyisibambiso somfokazi,

umbambe abe yisibambiso

omele umfokazi.

₁₇Ukudla okutholakale ngomgunyathi kumnandi,

kodwa kamuva umlomo uyakugcwala uhlwayi.

₁₈Amacebo wonke aqiniswa ngokululekana;

yilwa impi ngamasu aphusile.

₁₉Ohamba encetheza wambula izimfihlo;

ungazihlanganisi nomuntu okhulumela safuthi.

₂₀Oqalekisa uyise nonina,

isibani sakhe siyocima phakathi kwesigayegaye.

₂₁Ifa elitholwe ngokuphazima kweso,

aliyukuphetha ngesibusiso.

₂₂Ungasho uthi:

“Ngiyakuphindisela okubi;”

lindela uSimakade, uyakukusindisa.

₂₃Izisindo ezimbili ezingezona ezeqiniso

ziyisinengiso kuSimakade,

nezilinganiso ezikhohlisayo azilungile.

₂₄Zonke izinyathelo zomuntu ziqondiswa nguSimakade;

pho umuntu angayiqonda kanjani

indlela yakhe na?

₂₅Kulugibe kumuntu ukusho ngokushesha athi:

“Kungcwele,”

bese ecabanga kamuva ngesifungo asenzile.

₂₆Inkosi ehlakaniphileyo iyazihlakaza izikhohlakali;

ukushinga kwazo ikuthele phezu kwazo.

₂₇Isibani sikaSimakade sihlola umoya womuntu;

siphenyisisa izibilini zomuntu.

₂₈Umusa neqiniso kuyayilonda inkosi;

isihlalo sayo sobukhosi sisekelwa ngomusa.

₂₉Udumo lwabasha lungamandla abo,

nemvunulo yabadala ingubumpunga.

₃₀Imivimbo elimazayo ihlanza ububi,

nokushaywa kuhlanza izibilini.