IZaga 17

₁Ungcono onokuncane, owomileyo enokuthula,

kunendlu egcwele okuhlatshiweyo nokuxabana.

₂Inceku eyenza okuhlakaniphileyo

iyabusa phezu kwendodana ehlazisayo;

iyakudla ifa njengomunye wezelamani.

₃Ukhamba lokuncibilikisela lungolwesiliva,

nesithando somlilo ngesegolide,

kepha nguSimakade ovivinya izinhliziyo.

₄Owenza okubi uqaphela izindebe zenkohlakalo,

nomqambimanga ubeka indlebe olimini olubi.

₅Odelela ompofu usola uMenzi wakhe,

nothokoza ngengozi akayukuyekwa angajeziswa.

₆Abazukulu bangumqhele wabadala,

abazali bayigugu kubantwana.

₇Izindebe ezinobugagu azisifanele isiwula;

kakhulu kangakanani-ke izindebe zenkohliso

kumuntu ohloniphekileyo na?

₈Ukufumbathisa kunjengetshe elinqabileyo emehlweni

alowo okwenzayo,

noma ebhekaphi uyaphumelela.

₉Osibekela isiphambeko ufuna uthando,

kepha olulandelayo udaba

udalula imfihlo,

wehlukanisa abangani abasondelene.

₁₀Ukusolwa kungena kujule kulowo onokuqonda,

kunemivimbo eyikhulu koyisiwula.

₁₁Omubi ufuna ukuhlubuka kuphela,

ngalokho uyakuthunyelwa isithunywa esinonya.

₁₂Kungcono ukuhlangana nebhere

elephucwe amawundlu alo,

kunesiwula ebuwuleni baso.

₁₃Ophindisela okuhle ngokubi,

ububi abuyukusuka endlini yakhe.

₁₄Ukuqala kwengxabano

kufana nokuvulelwa kwamanzi,

ngakho-ke shiya kungakaqubuki ingxabano.

₁₅Othetha ngecala isikhohlakali,

nolahla ngecala olungileyo,

bobabili bayisinengiso kuSimakade.

₁₆Yini ukuba isiwula

sibe nemali yokuthenga

ukuhlakanipha esandleni,

sibe singenangqondo na?

₁₇Umngani uyathanda ngezikhathi zonke,

kodwa umfowenu wazalelwa

ukukuthwalisa ngezikhathi zobunzima.

₁₈Umuntu oswela ukuqonda uxhawulana nomunye,

enze isivumelwano,

isithembiso phambi kukamakhelwane wakhe.

₁₉Owephula umthetho uthanda ingxabano;

owenza isango lakhe liphakame

ukhonga ukubhujiswa.

₂₀Onenhliziyo ephambeneyo akakufumani okuhle;

onolimi oluphambeneyo uwela engozini.

₂₁Ozala isiwula ufumana usizi;

uyise wesiwula akathokozi.

₂₂Inhliziyo eyenamileyo iyikhambi elihle,

kepha umoya owaphukileyo

womisa amathambo.

₂₃Isikhohlakali semukela umfumbathiso ofihliwe,

ukuze sihlanekezele izindlela zokwehlulela.

₂₄Ukuhlakanipha kuphambi komuntu onokuqonda,

kepha amehlo esiwula asemikhawulweni yomhlaba.

₂₅Indodana eyisiwula iwusizi kuyise,

nomunyu kowayizalayo.

₂₆Ukuhlawulisa olungileyo akukuhle,

nokushaya abaqotho akulungile.

₂₇Obamba amazwi akhe unokwazi;

onomoya ozothile ungumuntu onokuqonda.

₂₈Nesiwula lapho sithule kuthiwa yisihlakaniphi,

novala umlomo wakhe unokuqonda.