INumeri 28

₁USimakade wakhuluma kuMose, wathi: ₂“Yala abantu bakwa-Israyeli, uthi kubo: ‘Anoqikelela ukuba umnikelo wami, isinkwa sami seminikelo yami yomlilo yephunga elimnandi kimi, ninikele ngawo kimi ngesikhathi sawo.’ ₃Uyothi kubo: ‘Nanku umnikelo womlilo eniyonikela ngawo kuSimakade: izimvu ezimbili ezingamaduna ezinonyaka ezingenasici, njalo ngosuku, zibe ngumnikelo oshiswa imihla yonke. ₄Enye imvu uyonikela ngayo ekuseni, enye kusihlwa. ₅Uyonikela nokweshumi kwe-efa lempuphu ecolisekileyo kube ngumnikelo wokusanhlamvu, oxovwe nokwesine kwehini lamafutha agxotshiweyo. ₆Kungumnikelo oshiswa imihla yonke, owamiswa entabeni iSinayi ukuze ube yiphunga elimnandi, umnikelo womlilo kuSimakade. ₇Umnikelo wawo wokuphuzwayo uyokuba ngokwesine kwehini ngemvu eyodwa. Umnikelo wesiphuzo esinamandla uyothululelwa uSimakade endaweni engcwele. ₈Enye imvu uyonikela ngayo kusihlwa. Uyonikela ngayo njengomnikelo wokusanhlamvu wasekuseni nomnikelo wawo wokuphuzwayo, umnikelo womlilo wephunga elimnandi kuSimakade.

₉“ ‘Ngosuku lweSabatha niyonikela ngezimvu ezimbili ezingamaduna ezinonyaka ezingenasici, nokweshumi okubili kwempuphu ecolisekileyo kube ngumnikelo wokusanhlamvu oxovwe namafutha nomnikelo wawo wokuphuzwayo. ₁₀Lo ngumnikelo oyoshiswa njalo ngeSabatha, wengeze phezu komnikelo wokushiswa wemihla ngemihla nowokuphuzwayo ohambisana nawo.

₁₁“ ‘Njalo ngosuku lokwethwasa kwenyanga, niyonikela kuSimakade ngomnikelo wokushiswa. Kuyoba ngamaduna amabili emhlanjini, inqama, amazinyane ayisikhombisa anonyaka, futhi angenasici. ₁₂Niyonikela ngokuthathu eshumini kwempuphu ecolisekileyo, ibe ngumnikelo wokusanhlamvu okuxovwe namafutha ngalelo nalelo duna. Niyonikela ngokweshumi okubili kwempuphu ecolisekileyo, kube ngumnikelo wokusanhlamvu oxovwe namafutha nenqama. ₁₃Niyonikela ngokweshumi kwempuphu ecolisekileyo exovwe namafutha, kuyoba ngumnikelo wokusanhlamvu ngaleyo naleyo mvu, umnikelo wokushiswa wephunga elimnandi, umnikelo womlilo kuSimakade. ₁₄Umnikelo wabo wokuphuzwayo uyokuba yingxenye yehini lewayini ngenkunzi, nokwesithathu kwehini ngenqama, nokwesine kwehini ngemvu; lokhu kungumnikelo wokushiswa wezinyanga zonke, kuzo zonke izinyanga zonyaka. ₁₅Nempongo iyoba ngumnikelo wesono kuSimakade; kuyonikelwa ngayo nomnikelo oshiswa imihla yonke nomnikelo wawo wokuphuzwayo.

₁₆“ ‘Ngenyanga yokuqala ngosuku lwe-14 lwayo, kuyakuba yiphasika likaSimakade. ₁₇Ngosuku lwe-15 lwaleyo nyanga, kuyakuba ngumkhosi, kudliwe isinkwa esingenamvubelo izinsuku eziyisikhombisa. ₁₈Ngosuku lokuqala kuyakuba ngumhlangano ongcwele; aniyukusebenza msebenzi. ₁₉Niyonikela kuSimakade ngomnikelo womlilo, umnikelo wokushiswa: amaduna amabili, inqama, izimvu ezingamaduna eziyisikhombisa ezinyaka munye, futhi ezingenasici. ₂₀Niyonikela ngomnikelo wazo wokusanhlamvu, impuphu ecolisekileyo exovwe namafutha, niyonikela ngokweshumi okuthathu ngenkunzi nangokweshumi okubili ngenqama. ₂₁Niyonikela ngokweshumi ngaleyo naleyo mvu yezimvana eziyisikhombisa, ₂₂nempongo ibe ngumnikelo wesono, ukunenzela ukubuyisana. ₂₃Niyonikela ngalokho nomnikelo oshiswa ekuseni, ongumnikelo oshiswa imihla yonke. ₂₄Niyonikela kanjalo imihla yonke kube izinsuku eziyisikhombisa; isinkwa somnikelo womlilo ube yiphunga elimnandi kuSimakade. Kuyonikelwa ngakho, nomnikelo oshiswa imihla yonke nomnikelo wawo wokuphuzwayo. ₂₅Ngosuku lwesikhombisa niyoba nomhlangano ongcwele; aniyukusebenza msebenzi.

₂₆“ ‘Ngosuku lolibo, lapho ninikela kuSimakade ngomnikelo omusha wokusanhlamvu emkhosini wenu wamaviki, niyoba nomhlangano ongcwele; aniyukusebenza msebenzi. ₂₇Niyonikela ngomnikelo wokushiswa, ube yiphunga elimnandi: amaduna amabili, inqama, izimvu ezingamaduna eziyisikhombisa ezinyaka munye. ₂₈Niyonikela ngomnikelo wazo wokusanhlamvu, impuphu exovwe namafutha, okuthathu eshumini ngaleyo naleyo nkunzi, nokweshumi okubili ngenqama, ₂₉nokweshumi ngaleyo naleyo mvu yezimvana eziyisikhombisa, ₃₀nempongo, ukunenzela ukubuyisana. ₃₁Niyonikela ngazo, ngaphandle komnikelo oshiswa imihla ngemihla nomnikelo wawo wokusanhlamvu, zibe ngezingenasici, neminikelo yazo yokuphuzwayo.