UMikha 6

“Sukuma umangalele izintaba,

amagquma mawalizwe iphimbo lakho.

₂Zwanini zintaba udaba lukaSimakade,

nazi zisekelo zomhlaba eziqinileyo,

ngokuba uSimakade unodaba ngabantu bakhe,

uzakuqagulisana no-Israyeli.

₃“Bantu bami, ngenzeni kinina na?

Nginikhathaze ngani na?

Ngiphenduleni.

₄Nganikhuphula eGibhithe,

nganihlenga endlini yezigqila,

ngathumela uMose, u-Aroni noMiriyamu

ukuba banihole.

₅Bantu bami, ake nikhumbule

okwahlelwa nguBhalaki inkosi yakwaMowabi,

nokuthi wamphendula wathini

uBhalamu indodana kaBheyori,

nokusuka eShithimi kuya eGiligali

ukuba nazi ngokulunga kukaSimakade.”

₆Ngiyakufika ngiphetheni nje kuSimakade,

engiyakukhothama nakho kuNkulunkulu ophezulu na?

Ngabe ngiyakufika kuye

neminikelo yokushiswa

namathole anonyaka na?

₇Ngabe uyakuthokoza yini uSimakade

ngezinqama eziyinkulungwane,

nangezinkulungwane ezilishumi zemifula yamafutha na?

Ngiyakunikela ngezibulo lami yini ngenxa yesiphambeko sami,

isithelo sesisu sami ngenxa yesono senhliziyo yami na?

₈Wena muntu, uSimakade ukutshelile

ukuthi kuyini okuhle,

nokuthi uSimakade ufunani kuwe,

ukuthi wenze ubulungiswa,

uthande ukwethembeka,

uhambe ngokuthobeka

kanye noNkulunkulu wakho.

₉Iphimbo likaSimakade limemeza umuzi.

Igama lakho liyakubona impumelelo.

Lalela sizwe kanye nalowo osiqokileyo.

₁₀Ngabe kusekhona ingcebo embi

endlini yezikhohlakali,

ne-efa elincane eliqalekisiweyo na?

₁₁Ngingathalalisa yini ngezikali zokuqola

nesaka lesisindo sobuqili na?

₁₂Labo abacebileyo bakhona

banobudlova obedlulele,

nezakhamuzi zakhona zihubhuza amanga,

nolimi lwenkohliso lusemlonyeni wazo.

₁₃Ngakho-ke Mina ngiyakukugulisa ngokukushaya,

ngikwenze incithakalo ngenxa yezono zakho.

₁₄Uyakudla, kodwa ungasuthi,

uyakubhekana nendlala,

uthathe kodwa ungakulethi endaweni ephephileyo,

noma yini oyiletha endaweni evikelekile,

ngiyakuyinikela enkembeni.

₁₅“Uyakutshala, kodwa ungavuni;

uyakugxoba iminqumo,

kepha ungazigcobi wena ngamafutha,

ukhame izithelo zomvini,

kodwa wena ungaliphuzi iwayini.

₁₆Izimiso zika-Omri ziyalandelwa,

nayo yonke imisebenzi yendlu ka-Ahabi

nihambe ngayo,

ngokwamacebo abo,

ngalokho-ke ngiyakunenza incithakalo,

nezakhamuzi into enximfelwayo,

niyakuthwala ihlazo labantu bami.”