UJobe 37

₁“Ngenxa yalokho inhliziyo yami iyathuthumela,

isuke endaweni yayo.

₂Lalelani, nizwe ukuduma kwezwi lakhe,

nemvunge ephuma emlonyeni wakhe.

₃Ukuthumela phansi kwezulu lonke,

unyazi lwakhe luye emagumbini omhlaba.

₄Emveni kwalokho izwi lakhe liyaduma,

uyaduma ngezwi lakhe lobukhosi,

akalunqandi unyazi

uma kuzwakala izwi lakhe.

₅UNkulunkulu uduma ngokumangalisayo ngezwi lakhe;

wenza izinto ezinkulu esingenakuziqonda.

₆Ngokuba uthi eqhweni:

‘Khithikela emhlabeni;’

kanjalo nasesihlambini semvula,

yebo, ezihlambini zezimvula zakhe ezinamandla.

₇Ubeka uphawu ezandleni zabantu

ukuze bonke abantu

bayazi imisebenzi yakhe.

₈Izilwane zibuyela ezikhundleni zazo,

zihlale emihumeni yazo.

₉Isikhwishikhwishi siphuma engosini yaso,

namakhaza avela emoyeni ohlabayo.

₁₀Ngokuphefumula kukaNkulunkulu,

kuvela ungqoqwane namanzi

ngobuningi bawo,

abe yiqhwa.

₁₁Yebo, ugcwalisa amafu ngomswakama,

awendlale amafu onyazi lwakhe,

₁₂ayazungeza,

ajikeleze njengalokhu ewaqondisa,

ukuze akufeze konke awayale khona

ebusweni bomhlaba,

₁₃noma ngabe lokho ukwenzela ukujezisa,

noma umhlaba wakhe,

noma ngothando,

uyakuvumela ukuba kwenzeke.

₁₄“Beka indlebe kulokhu, Jobe,

uthule du,

uzindle ngezimangaliso zikaNkulunkulu.

₁₅Uyazi yini ukuthi uNkulunkulu uwashayela

kanjani umthetho,

enze unyazi lwakhe lubanize emafini na?

₁₆Uyazi yini ukuthi amafu

endlaleke kanjani,

umsebenzi omangalisayo

walowo Ophelele olwazini,

₁₇wena ozembatho zakho zifudumele,

lapho umhlaba uthule ngenxa yeshisandlu na?

₁₈Ungaseneka yini isibhakabhaka njengaye,

siqine njengesibuko esibunjiweyo na?

₁₉Sifundise esiyakukusho kuye,

asinakulubeka udaba lwethu,

ngenxa yokuthi sidukuza oswini.

₂₀Angatshelwa yini uNkulunkulu

ukuthi ngizokhuluma na?

Ukhona yini ongathi

ufuna ukubhujiswa na?

₂₁Abantu abazukuwubona umbani emafini

ngoba umoya sewedlulile, selicwathile.

₂₂Ngasenyakatho kuqhamuka inkazimulo yegolide,

uNkulunkulu wembethe ubukhosi obesabekayo.

₂₃USomandla singemqonde,

mkhulu ngamandla nangobulungiswa,

ngokulunga kwakhe okukhulu akoni muntu.

₂₄Ngakho-ke abantu bayamesaba,

kodwa akabagqizi qakala

abacabanga ukuthi bayizihlakaniphi ezinhliziyweni zabo.”