UJobe 19

₂“Kuyoze kube nini nihlupha umphefumulo wami,

ningihlifiza ngamazwi na?

₃Sekuze kwaba kalishumi ningingcofa,

kodwa anizange nibe namahloni

okuthi ningiphathe kabi.

₄Uma impela ngonile,

ukona kwami kuhleli kimi.

₅Uma impela niyozikhukhumeza ngaphezu kwami,

niphikisana nami ngehlazo lami,

₆yazini-ke ukuthi nguNkulunkulu owenze okubi kimi,

wangigubuzela ngenetha lakhe.

₇Noma ngikhalile ngathi:

‘Indluzula!’

kepha angiphendulwanga,

ngicele ukusizwa,

kodwa abukho ubulungiswa.

₈Uyivalile indlela yami ukuze ngingedluli,

wabeka ubumnyama ezindleleni zami.

₉Uluhlubulile udumo lwami kimi,

wasusa umqhele ekhanda lami.

₁₀Ungidilizele phansi nxazonke,

ngaphela nya,

ithemba lami ulisiphule njengesihlahla.

₁₁Ungivuthele ngentukuthelo yakhe,

wangithatha njengesitha sakhe.

₁₂Amabutho akhe atheleke kanyekanye,

angizungeza ngemigoqo yokuhlasela,

akanisa nxazonke zethende lami.

₁₃“Uqhelisele kude abafowethu,

abazana nami bangihlubuka impela.

₁₄Izihlobo zami zingishiyile,

nengazana nabo bangikhohliwe.

₁₅Abagogobele endlini yami

nezincekukazi zami

bangenza umfokazi,

sengingowezizwe emehlweni abo.

₁₆Uma ngibiza inceku yami, ayisabeli,

sekuyimina engiyincenga ngomlomo wami.

₁₇Umoya wami uyanuka kumkami,

sebeyanengwa yimi,

ngisho nabantwana

esaphuma nabo siswini

sinye kumame.

₁₈Sengedelelwa ngisho nayizingane,

uma ngivuka, zikhuluma kabi ngami.

₁₉Abangani bami ebesingamathe nolimi nabo

sebeyangenyanya,

nalabo engibathandayo sebengifulathele.

₂₀Amathambo ami anamathela esikhumbeni sami

nasenyameni yami,

ngisinde ngokulambisa kuphela.

₂₁Ngihawukeleni,

ngihawukeleni,

nina bangani bami,

ngokuba isandla sikaNkulunkulu singishayile.

₂₂Ningihluphelani njengalokhu noNkulunkulu enza na?

Anisuthi yini yinyama yami na?

₂₃“Sengathi amazwi ami angalotshwa phansi!

Sengathi amazwi ami abengaqoshwa emqulwini,

₂₄aqoshwe edwaleni ngosiba lwensimbi nomthofu,

ukuze ahlale ingunaphakade!

₂₅Kepha mina ngiyazi

ukuthi uMhlengi wami uyaphila,

ekupheleni uyakuma othulini.

₂₆Lapho sesishabalele isikhumba sami,

ngiyakumbona uNkulunkulu

ngingokhululekile emzimbeni.

₂₇Ngiyakumbona mina uqobo lwami,

amehlo ami ayakumbona,

hhayi njengomfokazi,

umphefumulo wami uqhilika injabulo

uma ngicabanga ngalokho.

₂₈Uma nithi:

‘Siyakumhlupha kanjani!’

bese nithi:

‘Umongo wendaba ukuye,’

₂₉yesabeni nina uqobo inkemba,

ngokuba ulaka lungolweziphambeko

ezifanele inkemba,

ukuze nazi ukuthi ukwehlulela kukhona.”