UJobe 17

₁“Umoya wami wephukile,

imihla yami iyaphela,

sengibhekene negodi.

₂Impela kukhona abangiklolodelayo eduze kwami,

neso lami lihleli ekungichukuluzeni kwabo.

₃Ake unginike isibambiso, ungimele,

ngubani oyokwenza isivumelwano nami na?

₄Ngokuba uzivalile izingqondo zabo,

ukuze zingaqondi,

ngakho-ke awuyukubaphakamisa.

₅Okhaphela abangani bakhe ngenxa yesabelo;

amehlo abantwana bakhe ayakufiphala.

₆Ungenze isiga ebantwini,

nokhafulelwa ebusweni.

₇Iso lami lifiphele ngenxa yosizi,

wonke amalungu ami anjengethunzi.

₈Abaqotho badumele ngalokhu,

ukuthi ongenacala uvukela ongenabunkulunkulu.

₉Olungileyo uyobambelela endleleni yakhe,

onezandla ezihlanzekileyo uyakukhula emandleni.

₁₀Kepha nina buyani manje ngothi lwenu,

nokho angiyukumthola ohlakaniphileyo phakathi kwenu.

₁₁Izinsuku zami seziphelile,

amasu ami asechithiwe,

nezifiso zenhliziyo yami.

₁₂Ubusuku babenza imini,

bathi: ‘Ukukhanya kuseduze nobumnyama.’

₁₃Uma ngithemba

ukuthi indawo yabafileyo

iyindlu yami,

ngendlale ukhukho lwami ebumnyameni,

₁₄ngibize ingcwaba

ngithi: ‘Ungubaba,’

nezimpethu: ‘Mame nodadewethu.’

₁₅Liphi pho ithemba lami na?

Yebo, ithemba lami,

ngubani oyakulibona na?

₁₆Ngabe liyokwehlela ezinsikeni zendawo yabafileyo,

sehle kanyekanye,

siyophumula othulini na?”