UJobe 13

₁“Bheka, iso lami likubone konke,

nendlebe yami yezwa, yaqonda.

₂Enikwaziyo nami ngiyakwazi,

aningedluli ngalutho.

₃Kepha ngizokhuluma kuSomandla,

ngifisa ukuqagulisana noNkulunkulu.

₄Kepha nina ningababheci ngamanga,

nonke niyizinyanga ezingathi shu.

₅Sengathi impela ningawuhlaba inhlali,

lokho kuyoba ngukuhlakanipha kini.

₆Ake nilalele ukuqagulisana kwami,

nizwe isikhalo sezindebe zami.

₇Niyokhuluma okubi yini ngoNkulunkulu,

niyokhuluma inkohliso ngaye na?

₈Niyobuvuna yini ubuso bakhe,

nimmele uNkulunkulu na?

₉Kuyakuba kuhle yini lapho eniphenya na?

Ningamkhohlisa yini

njengalokhu kukhohliswa umuntu na?

₁₀Impela uyakunisola

uma niyokwenzelela ngasese.

₁₁Ubukhosi bakhe abuyukunethusa yini,

nokwesabisa kwakhe kwehlele kini na?

₁₂Izikhumbuzo zenu ziyizaga zomlotha,

nezivikelo zenu ziyizivikelo zobumba.

₁₃“Thulani, ukuze ngikhulume,

noma ngabe ngehlelwa yini

akusho lutho lokho.

₁₄Yingani ngibeka ukuphila kwami engcupheni,

ngibeka impilo yami ezandleni zami na?

₁₅Uzongibulala,

angisenathemba,

ngizozivikela izindlela zami,

ngilubeke udaba lwami phambi kwakhe.

₁₆Lokhu kuyakuba yinsindiso yami,

ukuthi ongenaNkulunkulu

akayukuza phambi kwakhe.

₁₇Lalelisisani amazwi ami,

nengikushoyo kungene ezindlebeni zenu.

₁₈Bhekani-ke, sengizilungiselele

ukwethula udaba lwami,

futhi ngiyazi ukuthi icala lizongithetha.

₁₉Ngubani ozophikisana nami na?

Ngokuba uma kunjalo

ngizozithulela ngize ngife.

₂₀Zimbili kuphela izinto

engicela ungenzele zona,

ukuze ngingabucasheli ubuso bakho:

₂₁dedisela kude nami isandla sakho,

ukwesabeka kwakho kungangethusi.

₂₂Khuluma, ngizophendula,

noma mangikhulume,

Wena ungiphendule.

₂₃Zingakanani iziphambeko zami

nezono zami na?

Ngazise izeqo zami nezono zami.

₂₄Ubufihleleni ubuso bakho,

ushaye sengathi ngiyisitha sakho na?

₂₅Uzokwethusa iqabunga eliphephukayo,

uxoshe inkunkuma eyomileyo na?

₂₆Ngokuba ubhala izinto ezibuhlungu ngami,

ungijezisela iziphambeko zasebusheni bami.

₂₇Izinyawo zami uzichome ezingongolweni,

waziqaphela zonke izindlela zami,

wamisa umkhawulo ematheni ezinyawo zami.

₂₈Ngiyaphela njengobolayo,

nanjengengubo edliwa ngubuvunya.”