U-Izaya 9

₂Abantu ababehamba ebumnyameni,

babonile ukukhanya okukhulu.

Labo abahlala ezweni

elimnyama bhuqe,

ukukhanya kuyakubakhanyisela.

₃Uyokwandisa isizwe,

usenze siphuphume injabulo;

siyothokoza phambi kwakho

njengokujabula ngesikhathi sokuvuna,

njengoba abantu bejabula

lapho babelana impango.

₄Ngokuba uyakunqamula ijoka lomthwalo wabo,

nenduku esemahlombe abo,

nentonga yocindezelayo,

njengosuku mhla kunqotshwa abakwaMidiyani.

₅Wonke amabhuzu amabutho abefakwe empini,

nezingubo ezazicwiliswe egazini, kuyoshiswa,

kudliwe ngumlilo.

₆Ngokuba sizalelwe uMntwana,

siphiwe iNdodana;

umbuso uyokuba semahlombe akhe.

IGama lakhe kuyothiwa nguMeluleki omangalisayo,

uNkulunkulu onamandla,

uYise ongunaphakade,

uMbusi wokuthula.

₇Umbuso wakhe uyokwanda njalo,

ukuthula kungaze kwaphela

esihlalweni sobukhosi sikaDavide

nasembusweni wakhe,

ukuze usekelwe,

umiswe ngobulungiswa nangobuqotho,

kusukela manje kuze kube phakade.

Intshisekelo kaSimakade Wamabandla

iyokwenza lokho.

₈INkosi ithumele izwi kwaJakobe,

lehlela nakwa-Israyeli.

₉Bonke abantu bayazi ngalo,

u-Efrayimi nezakhamuzi zaseSamariya,

kodwa okwathi ngokuqhosha

nangokuzidla kwabo, bathi:

₁₀“Izitini ziwele phansi,

kodwa sizokwakha kabusha

ngamatshe abaziweyo;

izihlahla zomkhiwane zigawuliwe,

kodwa sizotshala ezomsedari

esikhundleni sazo.”

₁₁USimakade ubavusele izitha zivela kuRezini,

ukuze zimelane nabo.

Wazigqugquzela izitha zabo,

₁₂ama-Aramu ngasempumalanga,

namaFilisti ngasentshonalanga,

bamsobozela u-Israyeli ngemilomo yabo.

Phezu kwakho konke lokho,

ulaka lukaSimakade alukabohli,

isandla sakhe sisashaya.

₁₃Abantu ababuyelanga kulowo obashayayo,

abamfunanga uSimakade Wamabandla.

₁₄Ngakho-ke ngalusuku lunye

uSimakade uyanquma kwa-Israyeli:

ikhanda nomsila,

igatsha lesundu nomhlanga.

₁₅Impunga nophakemeyo bayikhanda,

umphrofethi ofundisa ngamanga ungumsila.

₁₆Labo abahola laba bantu bayabadukisa,

nalabo abaholwayo badidekile.

₁₇Ngalokho-ke iNkosi ayithokozi ngezinsizwa zabo,

ayinasihawu ezintandaneni nakubafelokazi bakhona.

Ngokuba yilowo nalowo kubo engenabuNkulunkulu,

abenzi bokubi,

bonke bakhuluma ubuwula ngemilomo yabo;

kukho konke lokhu

intukuthelo kaSimakade ayibohli,

nesandla sakhe sisashaya.

₁₈Ngokuba inkohlakalo ivutha njengomlilo,

iqothula ameva namakhakhasi,

yokhele ihlozi lehlathi,

kwenyuka isikhatha sentuthu

sibheke phezulu.

₁₉Ngentukuthelo kaSimakade Wamabandla, izwe lashiswa;

abantu bafana nenswani,

badliwe ngumlilo,

akwababikho ophephisa umakhelwane wakhe.

₂₀Badla okungakwesokunene,

basala belambile,

badla okungakwesokhohlo,

kabaze beneliswa;

yilowo nalowo wadla inyama

yengalo yakhe,

₂₁uManase uphendukele u-Efrayimi,

u-Efrayimi waphendukela uManase,

bobabili baphendukele uJuda.

Kukho konke lokho

ulaka lukaSimakade alubohlanga,

nesandla sakhe usashaya ngaso.