U-Izaya 53

₁Ngubani owakholwa ngesikuzwileyo;

ingalo kaSimakade yambulelwa bani na?

₂Ngokuba yakhula njengehlumela phambi kwakhe,

nanjengempande emhlabathini owomileyo;

yayingenasimo nabuhle ukuba siyibuke,

yayingabukeki ukuba siyifune.

₃Yayidelelekile, yashiywa ngabantu,

umuntu wobuhlungu okujwayele ukugula;

yayeyiswa, injengofihlelwa ubuso ngabantu,

asiyishayanga nto yalutho.

₄Kodwa yazithwala izifo zethu,

yabetshatha ubuhlungu bethu,

kepha thina sathi ijezisiwe,

ishaywe nguNkulunkulu, ihlushiwe.

₅Yebo, yahlatshwa ngenxa yeziphambeko zethu,

yachotshozwa ngobubi bethu;

isijeziso sethu saba phezu kwayo,

ukuze sibe nokuthula;

nangemivimbo yayo, siphilisiwe thina.

₆Thina sonke sidukile njengezimvu;

yilowo nalowo uphendukele endleleni yakhe.

USimakade wehlisela phezu kwayo

ububi bethu sonke.

₇Yacindezelwa, yahlushwa,

kodwa ayiwuvulanga umlomo wayo.

Njengewundlu liyiswa ekuhlatshweni,

nanjengemvu ithule

phambi kwabagundi bayo,

ayiwuvulanga umlomo wayo.

₈Yasuswa ekucindezelweni nasekwehlulelweni.

Ngubani esizukulwaneni sayo owacabanga

ukuthi yanqunywa ezweni labaphilayo,

ishayiwe ngesiphambeko sabantu bami na?

₉Babeka ithuna layo kanye nababi;

ekufeni yayinabenza okubi,

noma ingenzanga ndluzula,

kungekho nankohliso emlonyeni wayo.

₁₀Nokho uSimakade wathanda ukuyishaya ngezifo.

Wenza umphefumulo wayo

waba ngumnikelo wecala.

Iyakusibona isizukulwane sayo,

yenze izinsuku zayo zibe ziningi,

nentando kaSimakade iyakuphumelela esandleni sayo.

₁₁Ekuhluphekeni kwayo iyakukubona, yaneliswe.

Ngokwazi kwayo inceku yami elungileyo,

iyakulungisisa abaningi,

ithwale izono zabo.

₁₂Ngalokho ngiyakuyabela indawo nabakhulu,

iyakuhlukanisa impango nabanamandla,

ngokuba yawuthulula umphefumulo wayo ekufeni,

yabalwa kanye nezelelesi;

nokho yathwala izono zabaningi,

yakhulekela aboni.