U-Izaya 5

₁Mangihlabelele ngothandiweyo wami,

isihlabelelo sothandiweyo ngesivini sakhe.

Othandiweyo wami wayenesivini egqumeni

elivunde kakhulu.

₂Wamba, wakhipha amatshe kuso,

watshala umvini omuhle,

wakha isiqongo sokulinda phakathi kwaso,

waqopha isikhamo kuso,

walindela ukuba sithele izithelo zomvini,

kodwa sathela izithelo zasendle.

₃“Manje-ke, nina enakhe eJerusalema

nani nonke kwaJuda,

ake nehlulele phakathi kwami

nesivini sami.

₄Yini esafanele ukwenziwa kuso

engingayenzanga kuso na?

Kungani ukuba ngithi ngilindele

ukuthi sithele izithelo zomvini,

sona sathela izithelo zasendle na?

₅Ngakho-ke manginitshele

engizokwenza esivinini sami:

ngizosusa uthango lwaso,

ukuze sidliwe,

ngibhidlize ugange lwaso,

ukuze sinyathelwe.

₆Ngizosenza sibe yincithakalo;

asiyukuthenwa, asiyukulinywa,

kodwa kuyakumila amakhakhasi nameva;

ngiyakuyala amafu

ukuba anganisi imvula phezu kwaso.”

₇Isivini sikaSimakade Wamabandla yindlu ka-Israyeli,

bonke abantu bakwaJuda

bayisithombo sakhe esithandekayo;

walindela ubulungiswa,

kodwa kwachitheka igazi;

wabheka ukulunga,

kodwa kwaba ngukukhala.

₈Maye kini enihlanganisa indlu nendlu,

ninezelele insimu kwenye,

kuze kungabe kusaba bikho ndawo,

ukuze kube yini nodwa enakhe emhlabeni!

“Impela iningi lezindlu liyokuba yincithakalo,

izindlu ezinkulu nezinhle

kungabi namuntu ohlala kuzo.

₁₀Ngokuba ama-eka alishumi esivini

ayakuthela ibhathi libe linye,

ihomere lembewu lithele i-efa nje.”

₁₁Maye kulabo abavuka ekuseni bathungathe

uphuzo olunamandla,

balibale kuze kuhlwe,

badakwe yiwayini!

₁₂Emadilini abo kukhona ihabhu,

ugubhu, isigubhu,

igekle newayini,

kodwa abayinaki imisebenzi kaSimakade;

kabaziboni nezenzo zezandla zakhe.

₁₃Abantu bami bayathunjwa bengazi;

amadoda ahloniphekileyo abhuqwabhuqwa yindlala,

nezixuku zigangadekile ngukoma.

₁₄Ngalokho indawo yabafileyo

inwebe umphimbo wayo,

yakhamisa umlomo ngokungenamkhawulo;

abahloniphekileyo, nesixuku esixokozelayo,

nabajabulayo phakathi kwabo,

behlela kuyo.

₁₅Abantu bathotshisiwe,

bonke behliselwe phansi;

amehlo abazigqajayo ayothotshiswa,

₁₆uSimakade Wamabandla uphakeme ekwehluleleni,

uNkulunkulu oNgcwele

ubonakalisile ubungcwele bakhe ngokulunga.

₁₇Izimvana ziyoklaba njengasemadlelweni azo,

namazinyane adle encithakalweni yabacebileyo.

₁₈Maye kulabo abadonsa ukona

ngezintambo zamanga,

nezono kungathi ngamagoda ezinqola,

₁₉abathi:

“Makaphangise,

asheshise umsebenzi wakhe

ukuze siwubone;

malisondele, lifike icebo loNgcwele ka-Israyeli,

ukuze sazi!”

₂₀Maye kulabo abathi

okubi kuhle, nokuhle kubi,

labo abathi ubumnyama kungukukhanya,

nokukhanya kungubumnyama;

abathi okubabayo kumtoti,

nokumtoti kuyababa!

₂₁Maye kulabo abazibona behlakaniphile,

nabazibona benokuqonda!

₂₂Maye kulabo abangamaqhawe ngokuphuza iwayini,

nabanekhono lokuxuba uphuzo oludakisayo;

₂₃abavuna izikhohlakali ngenxa yenzuzo,

bangabenzeli ubulungiswa abalungileyo!

₂₄Njengamalangabi ekhotha amabibi,

nezikhotha ezomileyo zizika kuwo,

impande yabo iyofana nokubola,

nembali yabo ibe njengothuli;

iyakuthuquka,

ngokuba bawulahlile umthetho kaSimakade Wamabandla,

baledelela izwi loNgcwele ka-Israyeli.

₂₅Ngenxa yalokho intukuthelo kaSimakade

yasivuthela isizwe sakhe,

welula isandla sakhe wasishaya.

Izintaba ziyathuthumela,

nezidumbu zabo ziyimfucuza emigwaqweni;

kukho konke lokhu

intukuthelo yakhe ayibohli,

isandla sakhe silokhu sishayile.

₂₆Uyophakamisela isizwe esikude ibhanela,

asihlabele ikhwelo sisemajukujukwini omhlaba;

yebo, siyakuza ngokushesha.

₂₇Akukho noyedwa oyokhathala,

akhubeke kuso;

akekho oyokozela, alale;

ibhande ezinkalo zabo aliyuqaqeka,

nomchilo ezicathulweni zabo awuyukugqabuka,

₂₈abamicibisholo iloliwe,

neminsalo yabo yonke insaliwe;

izinyawo zamahhashi abo ziyakufaniswa nezensengetshe;

namasondo abo, njengesivunguvungu.

₂₉Ukubhonga kwabo kunjengokwengonyama;

bayakubhonga njengamabhongo ebhubesi;

yebo, bayogwavuma,

babambe impango yabo,

bahambe nayo,

kungekho ongayihlenga.

₃₀Ngalolo lusuku bayogwavuma phezu kwabo,

njengokuduma kolwandle;

uma umuntu ebuka umhlaba,

kuyobe kunesigayegaye sobumnyama,

ukukhanya kuphenduke ubumnyama ngenxa yamafu.