UHoziya 9

₁Israyeli, ungajabuli,

ngokuthokoza okufana nokwabezizwe,

ngokuba uzifebele wena,

wahlubuka kuNkulunkulu wakho,

wathanda inkokhelo yesifebe

kuzo zonke izibuya zokusanhlamvu.

₂Isibuya nesikhamo sewayini akuyukubondla,

newayini elisha liyakumdumaza.

₃Abayukuhlala ezweni likaSimakade,

u-Efrayimi uyakubuyela eGibhithe,

badle ukudla okungcolileyo e-Asiriya.

₄Abayukumthungela uSimakade iwayini,

nemihlatshelo yabo ayiyukuba yintokozo kuye,

isinkwa sabo siyakuba

njengesinkwa sokulila kubo,

kuthi bonke abasidlayo bazingcolise bona.

Ngokuba isinkwa sabo singesephango labo,

asiyukungena endlini kaSimakade.

₅Niyokwenzenjani ngosuku lwedili,

nangosuku lomkhosi kaSimakade na?

₆Bhekani-ke, noma bangaphunyuka ekubhujisweni,

kodwa iGibhithe liyakubabutha,

iNofi ibambele;

ingcebo yabo yesiliva idliwe yimbabazane,

kube nameva emathendeni abo.

₇Sezifikile izinsuku zokujeziswa,

izinsuku zokuphindisela,

u-Israyeli makakwazi lokho.

Umphrofethi uyisiwula,

umuntu onomoya uyahlanya

ngenxa yeziphambeko zakho eziningi

nangobutha obukhulu.

₈Umphrofethi ungumlindi ka-Efrayimi

kanye noNkulunkulu wami,

kodwa umphrofethi ubekelwe ugibe lwezinyoni

kuzo zonke izindlela zakhe,

nobutha busendlini kaNkulunkulu wakhe.

₉Sebeshone shi enkohlakalweni

njengasezinsukwini zaseGibheya;

uyakukhumbula iziphambeko zabo,

abajezisele izono zabo.

₁₀“Ngamthola u-Israyeli njengezithelo zomvini ehlane,

ngabona okhokho bakho

njengolibo lomkhiwane

emkhiwaneni lapho uqala.

Kepha bafika eBhali Pheyori,

bazinikela ehlazweni,

baba ngokunengekayo njengalokho abakuthandayo.

₁₁Udumo luka-Efrayimi luyakundizela kude njengenyoni,

kungabi bikho kuthatha sisu,

kukhulelwa nakuzala.

₁₂Noma bangakhulisa izingane zabo,

kodwa ngiyakubephuca zona zonke.

Maye impela kubo,

lapho ngibafulathela!

₁₃Ngimbonile u-Efrayimi enjengeThire,

etshalwe endaweni evundileyo,

kepha u-Efrayimi uyakukhiphela

izingane zakhe kumbulali.

₁₄“Simakade, banike.

Ngabe uyakubanikani na?

Isisu esiphuphumileyo

namabele angenalubisi.

₁₅Bonke ububi babo buseGiligali,

impela ngabazonda khona lapho;

ngenxa yobubi bezenzo zabo

ngiyakubaxosha endlini yami,

angiyukubathanda futhi;

zonke izikhulu zabo zingamahlubuka.

₁₆U-Efrayimi unqundiwe,

impande yabo yomile,

abayukuthela sithelo.

Noma bangazala,

kodwa ngiyakubulala okuyigugu kwesisu sabo.”

₁₇UNkulunkulu wami uyakubalahla,

ngokuba abamlalelanga,

bayakuba yimihambima phakathi kwezizwe.