UHoziya 7

₁“Lapho nje ngimphulukisa u-Israyeli,

kuyakuhlala obala isiphambeko sika-Efrayimi

nobubi beSamariya,

ngokuba benza inkohliso,

kwagqekeza amasela,

neqembu labaphangi lahlasela emigwaqweni.

₂Abacabangi emiqondweni yabo

ukuthi ngibukhumbula bonke ububi babo.

Manje sebehaqwe yizenzo zabo,

eziphambi kobuso bami.

₃“Bathokozisa inkosi ngobubi babo,

nezikhulu ngamanga abo.

₄Bonke bayiziphingi,

banjengeziko elibaswe ngumbhaki,

oyekela ukukhwezela

kusukela ekuxoveni inhlama ize ikhukhumale.

₅Ngosuku lwenkosi yethu

izikhulu zazigulisa ngokushisa kwewayini;

yona yelula isandla sayo nezigebengu.

₆Impela bashisisa izinhliziyo zabo

ngamacebo abo njengeziko,

umbhaki wabo ulala ubusuku bonke;

ekuseni livutha njengomlilo wamalangabi.

₇Bonke bashisa njengeziko,

bashwabadela ababusi babo.

Wonke amakhosi abo awile,

akukho namunye phakathi kwabo ongibizayo.

₈“U-Efrayimi uzihlanganisa nezizwe,

usephunduke iqebelengwana lesinkwa elingaphendulwanga.

₉Abafokazi badle amandla akhe,

kodwa yena akazi;

izinwele zakhe seziyaqhakaza,

kepha yena akazi.

₁₀Ukuzigqaja kuka-Israyeli kuyafakaza ebusweni bakhe,

kodwa ababuyelanga kuSimakade uNkulunkulu wabo,

abamfunanga kukho konke lokho.

₁₁“U-Efrayimi usenjengejuba elingenangqondo;

babize iGibhithe, baya e-Asiriya.

₁₂Kuyakuthi lapho sebehamba,

ngiphonse inetha lami phezu kwabo,

ngibathele othulini njengezinyoni zezulu,

ngibabambe lapho ngizwa umbiko

ngokuhlangana kwabo.

₁₃Maye kubo, ngokuba bangibalekele!

Bazokwehlelwa yinhlekelele,

ngokuba bangihlubukile.

Bengiyakubahlenga Mina,

kodwa bakhulume amanga ngami.

₁₄Abakhalanga kimi ngenhliziyo yabo,

kodwa bahhewula emibhedeni yabo;

babuthana ngenxa yokusahlamvu

newayini elisha,

bangifulathela Mina.

₁₅Mina ngabaqeqesha,

ngaqinisa izandla zabo,

kodwa bangakhela uzungu.

₁₆Babuya, kodwa hhayi koPhezukonke,

babanjengomnsalo oxegayo;

abaholi babo bayakufa ngenkemba

ngenxa yokugxibha kolimi lwabo.

Bayakuba yinhlekisa eGibhithe.”