UHoziya 10

₁U-Israyeli wayengumvini owenabileyo,

wathela izithelo zakhe eziningi,

ngokwanda kwesithelo sakhe

wandisa ama-althare akhe;

kwathi ngokuchuma kwezwe lakhe

wenza izinsika ezingcwele.

₂Inhliziyo yabo inobuqili;

manje-ke bayakulithwala icala labo.

USimakade uyakuwacekela phansi ama-althare abo,

abhidlize izinsika zabo ezingcwele.

₃Impela, manje bayakuthi:

“Asinankosi, ngokuba asimesabanga uSimakade;

pho inkosi ibizosenzelani na?”

₄Bakhuluma amazwi nje,

bafunga amanga,

benza isivumelwano;

bese kuqubuka ukwehlulela

njengesithombo esinobuthi emiseleni yamasimu.

₅Izakhamuzi zaseSamariya ziyakwesaba

ngenxa yethole laseBhethi Aveni,

ngokuba abantu bakhona

nabaphristi balo bayakulililela,

phela udumo lwalo selushabalele kulo.

₆Liyakuthwalwa lisiwe e-Asiriya

libe yisipho senkosi uJarebi;

u-Efrayimi uyakwemukela ihlazo,

u-Israyeli abe namahloni ngezeluleko zakhe.

₇ISamariya nenkosi yalo kuyomuka njengebazela

lintanta emanzini.

₈Izindawo eziphakemeyo e-Aveni,

eziyisono sakwa-Israyeli, ziyakubhidlizwa.

Kuyakumila ameva namakhakhasi

kumboze ama-althare abo;

bayakuthi ezintabeni:

“Simbozeni,”

bathi emagqumeni:

“Welani phezu kwethu.”

₉“Israyeli, selokhu wona

kusukela ezinsukwini zaseGibheya.

Bahlala lapho;

impi nabantu bobubi

ayiyukubafica eGibheya na?

₁₀Kuyakuthi uma sengithanda, ngibajezise.

Izizwe ziyakubahlanganyela

lapho zibabopha ngeziphambeko zabo eziphindwe kabili.

₁₁U-Efrayimi uyisithole esifundisiweyo,

esithanda ukubhula okusanhlamvu;

ngizomgaxa ijoka entanyeni yakhe enhle,

u-Efrayimi ngimdonsise,

uJuda alime,

uJakobe azicubuzele amagade.

₁₂Zihlwanyeleleni ukulunga,

nivune umlomo wothando,

niqathe insimu yenu engalinyiwe,

ngokuba sekuyisikhathi sokufuna uSimakade,

aze afike, anise ukulunga phezu kwenu.

₁₃Nilime inkohlakalo,

navuma ukungalungi,

nidle isithelo senkohliso,

ngokuba nethembela endleleni yenu

nasebuningini bamabutho enu.

₁₄Kuyakuqubuka ukuxokozela phakathi kwabantu bakho,

zibe yincithakalo zonke izinqaba zakho,

njengencithakalo eyenziwa uShalimani,

eBhethi Aribheli ngosuku lwempi,

kuphihlizwa unina nezingane.

₁₅Kuyokwenziwa kanjalo nakuwe Bhethele,

ngenxa yokonakala okukhulu;

inkosi yakwa-Israyeli iyobhujiswa

iphele nya entathakusa.”