IGenesisi 32

₁UJakobe wabamba eyakhe indlela, izingelosi zikaNkulunkulu zamhlangabeza. ₂UJakobe ezibona, wathi kuzo: “Leli yibutho likaNkulunkulu.”

Wayiqamba leyo ndawo ngokuthi yiMahanayimu.

₃UJakobe wathumela izithunywa ukuba zimendulele ziye kumnewabo u-Esawu, owayeseSeyiri, kwa-Edomi, ₄waziyala wathi: “Niyakuthi ku-Esawu inkosi yami: ‘Ithi inceku yakho uJakobe: bengigogobele kwaLabani angaze ngashesha ukubuya kuze kube manje. ₅Nginezinkomo, izimbongolo, izimvu, izinceku zesilisa nezesifazane, ngakho-ke ngithumele ukuyazisa inkosi yami ukuze ngifumane umusa kuyo.’ ”

₆Izithunywa zabuyela kuJakobe zathi: “Sihambile saya kumnewenu u-Esawu, naye usendleleni ukuzokuhlangabeza, uza namadoda angama-400.”

₇UJakobe wesaba kakhulu, wakhathazeka, wayesehlukanisa abantu ayehamba nabo, nezimvu, nezinkomo, namakameli, kwaba ngamaqembu amabili, ₈ethi emcabangweni wakhe: “Uma u-Esawu efika eqenjini lokuqala elibhubhisa, elinye liyokwazi ukuphunyuka.”

₉UJakobe wathandaza wathi: “Nkulunkulu kababamkhulu u-Abhrahama nokababa u-Isaka. Wena Simakade wathi kimi: ‘Buyela ezweni lakini nasezihlotsheni zakho, ngizokwenzela okuhle.’ ₁₀Angilufanele lolu thando ongenzele lona nokwethembeka okungaka okukhombise mina inceku yakho. Ngawela leli Jordani ngiphethe kuphela udondolo, kodwa manje senginamaqembu amabili. ₁₁Ngiyakunxusa, ngihlenge esandleni somnewethu u-Esawu, ngokuba ngiyamesaba, hleze afike angihlasele mina, nabafazi bami, nezingane zami. ₁₂Wena luqobo uthe: ‘Ngizokwenzela okuhle, ngandise izizukulwane zakho zibe njengezihlabathi zolwandle ezingenakubalwa.’ ”

₁₃Walala lapho ngalobo busuku. Kwathi ezintweni ayenazo wathathela umnewabo u-Esawu isipho: ₁₄izimbuzikazi ezingama-200, nezimpongo ezingama-20, izimvukazi ezingama-200, nezinqama ezingama-20, ₁₅amakameli ezinsikazi angama-30, namankonyane awo, izinkomazi ezingama-40, nezinkunzi ezilishumi, izimbongolo zezinsikazi ezingama-20, nezingamaduna eziyishumi. ₁₆Wazinikela zonke lezo zilwane esandleni sezinceku zakhe ukuba ziziqhube, umhlambi ngamunye. Wathi ezincekwini zakhe: “Hambani phambi kwami, nishiye isikhala phakathi kwemihlambi.”

₁₇Wathi kumholi womhlambi wokuqala: “Lapho uhlangana nomnewethu u-Esawu, bese ekubuza ethi: ‘Ungokabani wena na? Ulibangisephi? Ungokabani lo mhlambi ophambi kwakho na?’ ₁₈Ubomphendula uthi: ‘Ungowenceku yakho uJakobe, uyisipho asithumelela inkosi yami u-Esawu, naye uyeza emva kwethu.’ ”

₁₉Wayala nowesibili, nowesithathu, nabo bonke ababeqhuba imihlambi, wathi: “Niyakuphendula ngokufanayo ku-Esawu lapho nihlangana naye, ₂₀futhi niyakuthi: ‘Bheka, inceku yakho uJakobe iyeza emva kwethu,’ ” ngokuba wacabanga ukuthi: “Ngingahle ngimthobise ngalesi sipho engisiqhuba phambi kwami, kuyothi lapho ngibona ubuso bakhe, mhlawumbe angemukele.”

₂₁Izipho zamendulela, kodwa yena ngalobo busuku wasala, walala lapho babekanise khona.

₂₂Ngalobo busuku wavuka, wathatha amakhosikazi akhe omabili, nezancinza zakhe zombili, namadodana akhe ayi-11, wabawelisa izibuko lomfula iJabhoki. ₂₃Wabathatha wabawelisa nempahla yonke ayenayo. ₂₄UJakobe wasala yedwa, indoda yimbe yabambana naye kwaze kwasa. ₂₅Lapho leyo ndoda ibona ukuthi ayimehluli uJakobe, yayisifinyelela enyongeni yakhe, yabhinyika esikhoxeni sayo besabambene.

₂₆Wayesethi kuJakobe: “Ngiyeke ngihambe ngokuba sekuyasa.”

Wayiphendula wathi: “Anginakukudedela ungakangibusisi.”

₂₇Leyo ndoda yathi kuye: “Ungubani igama lakho na?”

Wayiphendula wathi: “NginguJakobe.”

₂₈Yayisithi kuye: “Awusezukubizwa ngokuthi unguJakobe, usuzobizwa ngokuthi ungu-Israyeli, ngokuba ulwe noNkulunkulu nabantu, wanqoba.”

₂₉UJakobe wayesethi kuyo: “Ngicela ungitshele igama lakho.”

Yamphendula wathi: “Ungibuzelani igama lami na?”

Yayisimbusisa khona lapho.

₃₀UJakobe wayiqamba leyo ndawo wathi kusePheniyeli, ngokuba wathi: “Sibonene noNkulunkulu ubuso nobuso, angaze ngafa.”

₃₁Laphuma ilanga lapho edlula ePheniyeli, eqhuga ngenxa yokubhinyika inyonga. ₃₂Kungenxa yalokho-ke abakwa-Israyeli bengawudli umsipha onamathele ethebeni lenyonga kuze kube namuhla, ngokuba uJakobe wathintwa lapho.