UHezekeli 42

₁Wayesengikhipha egcekeni elingaphandle elingasenyakatho, wangingenisa ekamelweni elibhekene nendawo eyahlukanisiweyo, eliqondene nesakhiwo esingasenyakatho, ₂ohlangothini olude, ubude balo babungamakhubhithi ayikhulu, umnyango walo ungasenyakatho. Ububanzi bawo babungamakhubhithi ayisihlanu. ₃Ngakolunye uhlangothi kwakungamakhubhithi angama-20, ayezungeze igceke elingaphakathi, kuthi maqondana nendawo egandayiweyo eyayingeyegceke elingaphandle kube khona umpheme oqondene nemipheme eyelakanyene kathathu. ₄Kwakukhona umhubhe phambi kwamakamelo, ububanzi bawo bungamakhubhithi alishumi ngaphakathi, ubude bawo buyikhulu; iminyango yawo yayingasenyakatho. ₅Amakamelo aphezulu ayemafishane, ngokuba imipheme yayithathe indawo enkulu kuwo kunaleyo eyayikweyangaphansi neyayiphakathi esakhiweni. ₆Ayengenazo izinsika ezazifana nezinsika zamagceke, njengoba wona ayelakanyene kathathu; lawo ayengaphezulu ayemancane kunalawo ayengaphansi naphakathi kusukela emhlabathini. ₇Ugange olwalungaphandle eceleni kwamakamelo ngasegcekeni elingaphandle lwalungamakhubhithi angama-50. ₈Nakuba amakamelo ayesegcekeni elingaphandle, ubude bawo babungamakhubhithi angama-50, kodwa phambi kwethempeli kwakungamakhubhithi ayikhulu. ₉Kusukela phansi kwalawo makamelo, kwakukhona indawo yokungena ngasempumalanga, lapho kwakungenwa khona uma uvela egcekeni elingaphandle.

₁₀Lapho ugange lwegceke lwalubanzi khona ngasempumalanga, phambi kwendawo eyahlukanisiweyo naphambi kwesakhiwo; nalapho kwakukhona amakamelo. ₁₁Indlela eyayiphambi kwawo yayifana neyamakamelo ayengasenyakatho, ububanzi bufana nobude; kanjalo nezindawo zawo zokuphuma neminyango yazo. ₁₂Njengeminyango yamakamelo ayeseningizimu, kwakukhona umnyango ekuqaleni kwendlela, indlela yayiqondene nogange ngasempumalanga, lapho kungenwa kuwo.

₁₃Wayesethi kimi: “Amakamelo asenyakatho namakamelo aseningizimu aphambi kwendawo eyahlukaniswe ngamakamelo angcwele, lapho abaphristi abaseduze noSimakade beyakudlela khona okungcwelengcwele. Bayakubeka lapho umnikelo wokusanhlamvu, umnikelo wesono nomnikelo wecala, ngokuba leyo ndawo ingcwele. ₁₄Kuyakuthi lapho abaphristi sebengenile, bangaphumeli endaweni engcwele ukuba baye egcekeni elingaphandle, bengakazibeki lapho izembatho zabo abakhonze ngazo, ngokuba zingcwele. Bayakwembatha ezinye izingubo, bese besondela kulokho okungokwabantu.”

₁₅Kwathi lapho eseqedile ukulinganisa indlu engaphakathi, wangikhipha ngendlela yesango elalingasempumalanga, walinganisa nxazonke. ₁₆Walulinganisa uhlangothi lwasempumalanga ngohlanga lokulinganisa: kwaba yizinhlanga ezingama-500 uma sekulinganiswe ngohlanga gimbici. ₁₇Walulinganisa uhlangothi lwasenyakatho: kwaba yizinhlanga ezingama-500 uma sekulinganiswe ngohlanga nxazonke. ₁₈Walulinganisa nohlangothi lwaseningizimu: kwaba yizinhlanga ezingama-500 uma sekulinganiswe ngohlanga lokulinganisa. ₁₉Wayesephendukela ohlangothini olungasentshonalanga walulinganisa: kwaba yizinhlanga ezingama-500 uma sekulinganiswe ngohlanga lokulinganisa. ₂₀Wayilinganisa ezinhlangothini zozine. Yayinogange oluyizungeze gimbici, ubude balo babungamakhubhithi angama-500 kanjalo nobubanzi balo, ukuba kwehlukaniswe phakathi kokungcwele nokungengcwele.