2 IZikhronike 21

₁UJehoshafathi walaliswa kokho bakhe, wembelwa kokhokho bakhe emzini kaDavide. UJehorama, indodana yakhe, waba yinkosi esikhundleni sakhe. ₂UJehoshafathi wayenabafowabo namadodana. Amadodana akhe kwakungu-Azariya, uJehiyeli, uZakhariya, u-Azariyahu, uMikhayeli noShefathiya; wonke lawa kwakungamadodana enkosi yakwa-Israyeli, uJehoshafathi. ₃Uyise uJehoshafathi wayebaphe izipho ezinkulu zesiliva, zegolide, nezinto ezinhle kakhulu nemizi ebiyelweyo kwaJuda, kodwa umbuso wawunika uJehoramu ngoba wayeyizibulo.

₄UJehoramu esemile embusweni kayise waziqinisa impela, wabe esebulala bonke abafowabo ngenkemba, nabathile ababengabaholi kwa-Israyeli. ₅UJehoramu wayeneminyaka engama-32 ngesikhathi eqala ukubusa, wabusa iminyaka eyisishiyagalombili eJerusalema. ₆Wahamba endleleni yamakhosi akwa-Israyeli njengoba kwenza abendlu ka-Ahabi, kwazise wayeganwe yindodakazi ka-Ahabi. Wenza okubi emehlweni kaSimakade. ₇Kepha uSimakade akathandanga ukuyibhubhisa indlu kaDavide ngenxa yesivumelwano ayesenze noDavide, wayethe uyakumnika yena nozalo lwakhe isibani, izinsuku zonke.

₈Emihleni yakhe abakwa-Edomi bahlubuka phansi kwesandla sikaJuda, bazibekela eyabo inkosi. ₉UJehoramu wayesewela nezinduna zakhe zonke, nezinqola zakhe zonke, wavuka ebusuku, wababhubhisa abakwa-Edomi ababemzungezile nezinduna zezinqola. ₁₀U-Edomi wahlubuka phansi kwesandla sabakwaJuda, kuze kube namuhla. Kwase kusuka neLibhina lahlubuka ngaso leso sikhathi, ngokuba wayemshiyile uSimakade uNkulunkulu wokhokho bakhe. ₁₁UJehoramu wabuye wenza izindawo eziphakemeyo ezintabeni zakwaJuda, waholela ukuba abakhileyo eJerusalema baphinge, wayenga uJuda.

₁₂Umphrofethi u-Eliya wamthumelela incwadi, ethi: “Usho kanje uSimakade uNkulunkulu kaDavide ukhokho wakho, uthi: ‘Ngenxa yokuba awuhambanga ngezindlela zikaJehoshafathi, uyihlo, nangezindlela zika-Asa, inkosi yakwaJuda, ₁₃kodwa uhambe ngendlela yamakhosi akwa-Israyeli, waholela uJuda nabakhileyo eJerusalema ekuphingeni, njengalokhu kwenza indlu ka-Ahabi, wabuye wabulala abafowenu bendlu kayihlo ababebahle kunawe; ₁₄ngakho-ke uSimakade uzoshaya ngokushaya okukhulu abantu bakho, amadodana akho, omkakho nayo yonke impahla yakho. ₁₅Wena uyakwehlelwa yisifo esikhulu, isifo esisezibilini; uyakugula zize izibilini zakho ziphumele ngaphandle usuku nosuku, uze ufe.’ ”

₁₆USimakade wavusela uJehoramu umoya kumaFilisti, nakwabase-Arabhiya ababengamaKhushe; ₁₇bonke bakhuphuka bayokulwa noJuda, babhodloza bangena khona, bathumba yonke impahla etholakala esigodlweni senkosi, amadodana ayo, nobomkayo, akwasala ndodana kuye, ngaphandle nje kukaJehowahazi owayengomncane emadodaneni akhe.

₁₈Sekwedlule konke lokho, uSimakade washaya uJehoramu ezibilinini, ngesifo esasingenakwelashwa. ₁₉Kwathi ngokuhamba kwesikhathi sekuzophela iminyaka emibili, zaqala ukuphuma izibilini zakhe, ngenxa yaleso sifo, wafa ngobukhulu ubuhlungu. Kepha abantu bakhe abazange bamshisele lutho lapho esekhotheme, njengoba babekade beshisela okhokho bakhe.

₂₀Waqala ukubusa eneminyaka engama-32, wabusa iminyaka eyisishiyagalombili eJerusalema. Wangcwatshwa engazange akhalelwe muntu. Bamngcwaba emzini kaDavide, kodwa hhayi emadlinzeni amakhosi.