1 IZikhronike 26

₁Nazi izigaba zabalindimasango: kumaKhorahi: nguMeshelemiya, indodana kaKhore emadodaneni ka-Asafa. ₂UMeshelemiya wayenalawa madodana: izibulo kunguZakhariya, eyesibili uJediyayeli, eyesithathu uZabhadiya, eyesine uJathiniyeli, ₃eyesihlanu u-Elamu, eyesithupha uJehohanani, eyesikhombisa kungu-Eliyohenayi. ₄U-Obhede Edomi wayenalawa madodana: izibulo kunguShemaya, eyesibili uJehozabhadi, eyesithathu uJowa, eyesine uSakhari, eyesihlanu uNethaneli, ₅eyesithupha u-Amiyeli, eyesikhombisa u-Isakhare, eyesishiyagalombili uPhewulethayi; uNkulunkulu wayembusisile impela.

₆Naye uShemaya wayenamadodana ayebusa indlu kayise, ngokuba ayengamaqhawe anamandla. ₇Amadodana kaShemaya: kungu-Othini, uRefayeli, u-Obhedi, u-Elizabhadi nabafowabo ababengamaqhawe anamandla, u-Elihu noSemakhiya. ₈Bonke labo kwakungabozalo luka-Obhede Edomi, bona, namadodana abo, nabafowabo, amadoda aqinileyo anamandla enkonzweni, babengama-62. ₉UMeshelemiya wayenamadodana nabafowabo, amadoda anamandla, eli-18. ₁₀UHosa owayengomunye wobozalo lukaMerari wayenamadodana: uShimiri wayeyinhloko nakuba engesilo izibulo, nguyise owambeka waba yinhloko. ₁₁Owesibili kwakunguHilikiya, owesithathu uThebhaliya, owesine kunguZakhariya; sebebonke, amadodana nabafowabo bakaHosa babeli-13.

₁₂Lezo zigaba zabalindimasango, izinhloko zabantu, zaba negunya ukukhonza endlini kaSimakade njengabafowabo. ₁₃Bashaya unkatho isango ngesango naphakathi komncane njengakomdala, ngokwezindlu zawoyise. ₁₄Unkatho lwasempumalanga lwadla uShelemiya. Base benza unkatho ngendodana yakhe, uZakhariya, owayengumeluleki owayehlakaniphile, wadliwa wunkatho lwasenyakatho. ₁₅Olwaseningizimu lwadla u-Obhede Edomi namadodana akhe, ukuba baqaphe inqolobane. ₁₆Olwasentshonalanga lwadla uShuphimi noHosa, ukuba babe ngabalindi abalinda ngasesangweni eShalekethi, ngendlela eyenyukayo. ₁₇Ngasempumalanga kwakunabaLevi abayisithupha, ngasenyakatho bebane ngosuku, ngaseningizimu bebane ngosuku nasenqolobaneni bebane. ₁₈Kwakukhona abane ngasentshonalanga endleleni, ePharibhari, kuthi ePharibhari uqobo kube nababili.

₁₉Lezo zigaba yizona ezabalindi ababevela ozalweni lukaKhorahi nakolukaMerari.

₂₀KubaLevi, u-Ahiya wayephethe ingcebo yendlu kaNkulunkulu nengcebo yezinto ezingcwele. ₂₁Amadodana kaLadani, ozalo lwamaGereshoni akwaLadani, izinhloko zoyise zakwaLadani umGereshoni, amaJehiyeli, ₂₂amadodana amaJehiyeli, uZethamu noJoweli umfowabo, ayengamele ingcebo endlini kaSimakade.

₂₃Kuma-Amramu, kumaJizihari, kumaHebhroni nakuma-Uziyeli; ₂₄uShebhuweli, indodana kaGereshomu kaMose, wayengumphathisikhwama. ₂₅Abafowabo ku-Eliyazeri: kwakunguRehabhiya, indodana yakhe, uJeshaya, uJoramu, uZikhiri noShelomothi. ₂₆UShelomothi nabafowabo babengamele yonke ingcebo yezinto ezingcwele ezazingcweliswe yinkosi uDavide, izinhloko zoyise, abakhuzi bempi bezinkulungwane, abakhuzi bempi bamakhulu nabakhuzi bempi. ₂₇Yibona ababengcwelisa okutholakale empini nasempangweni ukuba kulungiswe indlu kaSimakade, ₂₈nakho konke uSamuweli umboni, uSawule indodana kaKhishi, u-Abhineri indodana kaNeri noJowabe indodana kaZeruya ababekungcwelisile; lokho okwakungcweliswe ngabantu abehlukene, konke kwaphathwa nguShelomothi nabafowabo.

₂₉KumaJizihari, uKhenaniya namadodana akhe babephethe umsebenzi ongaphandle kwa-Israyeli, beyizikhulu nabehluleli. ₃₀KumaHebhroni, uHashabhiya nabafowabo, bengamaqhawe anamandla ayi-1 700, futhi bengababonisi kwa-Israyeli, phesheya kweJordani entshonalanga. Bengababonisi emsebenzini wonke kaSimakade nasezinkonzweni zenkosi. ₃₁KumaHebhroni, nguJeriya owayeyinhloko yezizukulwane ngokwezindlu zoyise. Ngonyaka wama-40 wokubusa kukaDavide kwafunwa, kwatholakala phakathi kwabo amaqhawe anamandla eJazeri kwaGileyadi. ₃₂Abafowabo, amaqhawe anamandla, babeyizi-2 700, izinhloko zoyise ezenziwa ababonisi abaphethe kwaRubeni, kwaGadi, nasengxenyeni yesizwana sakwaManase. Babephethe ezindabeni zonke zikaNkulunkulu, nasezindabeni zenkosi.