1 IZikhronike 24

₁Nazi izigaba ozalweni luka-Aroni. Amadodana ka-Aroni: nguNadabi, u-Abhihu, u-Eleyazare no-Ithamari. ₂UNadabi no-Abhihu bafa kuqala kunoyise, bengenabantwana. U-Eleyazare no-Ithamari bakhonza bengabaphristi. ₃UDavide, uZadoki, omunye wozalo luka-Eleyazare, no-Ahimeleki, wozalo luka-Ithamari, babehlukanisa ngezigaba zabo, ngokomsebenzi wabo. ₄Ozalweni luka-Eleyazare kwatholakala amadoda amaningi ayizinhloko kunasozalweni luka-Ithamari. Ahlukaniswa kanje: ozalweni luka-Eleyazare kwakukhona abali-16 ababeyizinhloko zezindlu zokhokho, nasozalweni luka-Ithamari kwatholakala abayisishiyagalombili ngokwezindlu zokhokho. ₅Bahlukaniswa ngokonkatho, ngokuba phakathi kwabo kwakukhona izikhulu zendlu engcwele nezikhulu zikaNkulunkulu ozalweni luka-Eleyazare noluka-Ithamari.

₆UShemaya, indodana kaNethaneli, umbhali ongumLevi, waloba phambi kwenkosi, nezikhulu, naphambi kukaZadoki, umphristi, no-Ahimeleki, indodana ka-Abhiyathara, nezinhloko zoyise, abaphristi nabaLevi. Enye indlu yoyise yayivela ku-Eleyazare, enye ivela endlini ka-Ithamari.

₇Unkatho lokuqala lwadla uJehoyaribi, olwesibili uJedaya, ₈olwesithathu uHarimi, olwesine uSehorimi, ₉olwesihlanu uMalikhiya, olwesithupha uMijamini, ₁₀olwesikhombisa uHakhosi, olwesishiyagalombili u-Abhiya, ₁₁olwesishiyagalolunye uJeshuwa, olweshumi uShekhaniya, ₁₂olwe-11 u-Eliyashibhi, olwe-12 uJakhimi, ₁₃olwe-13 uHupha, olwe-14 uJeshebheyabe, ₁₄olwe-15 uBhiliga, olwe-16 u-Imeri, ₁₅olwe-17 uHeziri, olwe-18 uHaphizezi, ₁₆olwe-19 uPhethahiya, olwama-20 uJehezekeli, ₁₇olwama-21 uJakini, olwama-22 uGamuli, ₁₈olwama-23 uDelaya, nolwama-24 uMahaziya.

₁₉Lezi kwakuyizigaba zabo ngokomsebenzi wabo, ukuba bangene endlini kaSimakade ngokomthetho ababewunikwe ngesandla sika-Aroni, uyise, njengalokho uSimakade uNkulunkulu ka-Israyeli ayemyalile.

₂₀Abaseleyo emadodaneni kaLevi kwakuyilaba: emadodaneni ka-Amramu nguShubhayeli; emadodaneni kaShubhayeli nguJehedeya. ₂₁KuRehabhiya: emadodaneni kaRehabhiya: nguJishiya, inhloko. ₂₂KumaJizihari: nguShelomothi; emadodaneni kaShelomothi: nguJahathi. ₂₃Amadodana kaHebhroni: nguJeriya, inhloko, owesibili ngu-Amariya, owesithathu nguJahaziyeli, owesine nguJekhameyamu. ₂₄Indodana ka-Uziyeli: nguMikha; indodana kaMikha nguShamiri. ₂₅Umfowabo kaMikha nguJishiya. Indodana kaJishiya nguZakhariya. ₂₆Amadodana kaMerari: nguMaheli, noMushi; indodana kaJahaziya nguBheno. ₂₇Amadodana kaMerari: nguJahaziya, uBheno, uShohamu, uZakhuri no-Ibhiri. ₂₈KuMaheli: ngu-Eleyazare, ongabanga namntwana. ₂₉KuKhishi: indodana kaKhishi nguJerameli. ₃₀Amadodana kaMushi: nguMaheli, u-Edere noJerimothi. Yilaba-ke ababengamadodana abaLevi ngezindlu zokhokho babo. ₃₁Nalaba benza unkatho njengabafowabo, amadodana ka-Aroni phambi kukaDavide, inkosi, uZadoki, u-Ahimeleki, nezinhloko zawoyise, abaphristi nabaLevi; omkhulu kubo kanjalo nomfowabo omncane.