UZefaniya 2

₁Qoqanani, nihlangane ndawonye,

sizwe esingenamahloni,

₂singakaphumi isinqumo,

lungakadluli lolo lusuku njengamakhoba,

lungakanehleli ulaka oluvuthayo lukaSimakade,

lungakafiki phezu kwenu

usuku lolaka lukaSimakade.

₃Funani uSimakade nina nonke

enithobekileyo bomhlaba,

nina enenze izehlulelo zakhe,

funani ukulunga,

nifune ukuthobeka,

mhlawumbe niyakukhoseliswa

ngosuku lolaka lukaSimakade.

₄Impela iGaza liyakusala dengwane,

i-Ashikeloni libe ngamanxiwa,

i-Ashidodi balixoshe emini kwabha,

kuthi i-Ekhroni lisishulwe.

₅Maye, kwabakhileyo ngasogwini lolwandle,

sizwe samaKherithe!

Izwi likaSimakade limelene nawe, Khanani,

lizwe lamaFilisti.

“Ngiyakukubhubhisa kungahlali muntu.”

₆Ugu lolwandle luyakuba ngamadlelo,

amadlangala abelusi, nezibaya zezimvu.

₇Ugu luyakuba ngolwensali

yabendlu yakwaJuda,

yeluse kulo.

Iyakulala ezindlini e-Ashikeloni kusihlwa,

ngokuba uSimakade uNkulunkulu wayo uyakuyihambela,

aguqule ukuthunjwa kwayo.

₈“Ngiyizwile inhlamba yabakwaMowabi,

namazwi ayiziswana abakwa-Amoni

abathuke ngawo abantu bami,

bazandisele imingcele ezweni labo.

₉Ngalokho-ke ngifunga ngiyagomela,”

kusho uSimakade Wamabandla,

uNkulunkulu ka-Israyeli, uthi:

“Impela uMowabi uyakuba njengeSodoma,

abantu bakwa-Amoni bafane neGomora,

izwe lembabazane nemigodi kasawoti

nencithakalo yaphakade.

Insali yabantu bami iyakubaphanga,

nabaseleyo besizwe sami bayakudla ifa labo.”

₁₀Yilokho okuyakuba ngokwabo

esikhundleni seqholo labo,

ngokuba bathuke inhlamba,

basongela abantu bakaSimakade Wamabandla.

₁₁USimakade uyakwesabeka kubo,

ngokuba uyakushabalalisa

bonke onkulunkulu bomhlaba.

Bayakukhuleka kuye,

kube yilowo nalowo esendaweni yakhe,

kuzo zonke iziqhingi zezizwe.

₁₂“Nani futhi maKhushe,

niyakubulawa ngenkemba yami.”

₁₃Uyakwelulela isandla sakhe enyakatho,

abhubhise i-Asiriya,

iNineve alenze libe yincithakalo,

lome njengehlane.

₁₄Imihlambi iyakubuthisa kulo,

zonke izilwane zesizwe,

isikhova nonoxhongo kuhlale

ezihlokweni zezinsika zalo ebusuku.

Umsindo wokukhala kwenyoni

uyakuzwakala efasiteleni,

imfucumfucu ibe sembundwini,

ngokuba imishayo yomsederi uyakuyibeka obala.

₁₅Yiwo lo muzi owawujabulile,

uhlala uvikelekile,

uthi enhliziyweni yawo:

“Yimina, mina ngedwa,

akekho omunye!”

Maye, ngokuphenduka kwawo

ube yincithakalo

nendawo yokubuthisa izilwane!

Bonke abadlula ngakuwo bayanximfa,

banikine amakhanda.