AMahubo 99

₁USimakade uyabusa, abantu mabathuthumele,

uhleli phezu kwamakherubhi, umhlaba mawuzamazame.

₂USimakade mkhulu eZiyoni,

uphakeme phezu kwezizwe zonke.

₃Mabalibonge igama lakhe elikhulu nelesabekayo;

ungcwele Yena.

₄Nkosi enamandla, mthandi wokulungileyo,

uqinise ubuqotho, waphakamisa ubulungiswa

nokulunga kwaJakobe.

₅Mphakamiseni uSimakade uNkulunkulu wethu,

nikhuleke ngasesenabelweni sezinyawo zakhe;

ungcwele Yena.

₆UMose no-Aroni babengabanye babaphristi bakhe,

uSamuweli engomunye wababekhuleka eGameni lakhe.

Bakhuleka kuSimakade, Yena wabaphendula.

₇Wakhuluma kubo esensikeni yefu,

bagcina ubufakazi bakhe

nezimiso abanika zona.

₈Simakade Nkulunkulu wethu,

Wena wabaphendula,

waba nguNkulunkulu othethelelayo kubo,

nophindiselayo ngezenzo zabo.

₉Mphakamiseni uSimakade uNkulunkulu wethu,

nikhuleke nisentabeni yakhe engcwele,

ngokuba uSimakade uNkulunkulu wethu ungcwele.