AMahubo 97

₁USimakade uyabusa,

umhlaba mawuthokoze,

zethabe iziqhingi eziningi.

₂Yena uphahlwe ngamafu nobumnyama,

ukulunga nobulungiswa kuyisisekelo

sesihlalo sakhe sobukhosi.

₃Umlilo uhamba phambi kwakhe,

uzishwabadele nxazonke izitha zakhe.

₄Imibani yakhe ikhanyisa umhlaba,

ukubona lokho umhlaba qede uthuthumele.

₅Izintaba zincibilikisa okwengcina phambi kukaSimakade,

phambi kweNkosi yawo wonke umhlaba.

₆Amazulu ashumayela ngokulunga kwakhe,

nezizwe zonke ziyayibona inkazimulo yakhe.

₇Bonke abakhonza izithombe ezibaziweyo mabajabhe,

labo abazigabisa ngezithombe.

Bonke onkulunkulu bakhothame phambi kwakhe.

₈IZiyoni liyezwa, futhi lithokozile,

namadodakazi akwaJuda ayethaba,

ngenxa yezehlulelo zakho, Simakade,

₉ngokuba Wena Simakade

ungoPhezu kwawo wonke umhlaba,

uphakeme kakhulu,

ngaphezu kwabo bonke onkulunkulu.

₁₀Nina enithanda uSimakade kuzondeni okubi,

Yena olondoloza imiphefumulo yabathembekile,

abasindise ezandleni zezikhohlakali.

₁₁Ukukhanya kukhanyisela olungileyo,

nokujabula kwabanhliziyo ziqotho.

₁₂Thokozani kuSimakade, nina balungileyo,

nibonge lapho nikhumbula ubungcwele bakhe.