AMahubo 96

₁Hlabelelani uSimakade ihubo elisha,

nimhlabelele uSimakade, mhlaba wonke.

₂Mhubeleni uSimakade, nibonge igama lakhe,

nimemezele insindiso yakhe imihla ngemihla.

₃Landani ngenkazimulo yakhe kwabezizwe,

nezimangaliso zakhe kubantu bonke.

₄Mkhulu uSimakade, udumisekile kakhulu,

uyesabeka ngaphezu konkulunkulu bonke.

₅Bonke onkulunkulu babezizwe bayizithombe,

kodwa uSimakade wenza izulu.

₆Udumo nobukhosi kusebusweni bakhe,

amandla nenkazimulo kusendlini yakhe engcwele.

₇Nina mindeni yabantu nikani uSimakade,

mnikeni uSimakade inkazimulo namandla.

₈Mnikeni uSimakade inkazimulo yegama lakhe,

nilethe umnikelo,

ningene emagcekeni akhe.

₉Khulekani kuSimakade, nihlobe ngobungcwele,

nithuthumele ebusweni bakhe, mhlaba wonke.

₁₀Shonini phakathi kwezizwe, nithi:

“USimakade uyinkosi;”

umhlaba umi uqinile, awunakunyakaziswa.

Uyokwehlulela izizwe ngobuqotho.

₁₁Malijabule izulu, umhlaba uthokoze,

maluhlokome ulwandle, nakho konke okukulo.

₁₂Mawethabe amasimu, nakho konke okukuwo,

kwename imithi yonke yehlathi

₁₃phambi kukaSimakade,

ngokuba uyeza,

impela uyeza ukuzokwehlulela umhlaba.

Uzowehlulela ngobuqotho umhlaba,

nezizwe ngokwethembeka kwakhe.