AMahubo 8

₁Simakade, Nkulunkulu wethu,

yeka ukubabazeka kwegama lakho

emhlabeni wonke!

Wena obeke inkazimulo yakho phezu kwamazulu.

₂Emlonyeni wezingane nowabancelayo,

umisile amandla ngenxa yezitha zakho,

ukuze ushabalalise isitha nomphindiseli.

₃Lapho ngibuka izulu lakho,

umsebenzi weminwe yakho,

inyanga nezinkanyezi okumisileyo,

₄uyini umuntu ukuba umkhumbule,

nendodana yomuntu ukuba uyinake na?

₅Umenzile waba ngaphansana kukaNkulunkulu,

wamthwesa umqhele wodumo nobukhosi,

₆umenze wabusa phezu kwemisebenzi

yezandla zakho;

wakubeka konke phansi kwezinyawo zakhe:

₇zonke izimvu, izinkomo,

izilwane zasendle,

₈izinyoni zezulu, izinhlanzi zasolwandle

nakho konke okuhamba ezindleleni zolwandle.

₉Simakade, Nkulunkulu wethu

igama lakho libabazeka

kangaka emhlabeni wonke!