AMahubo 78

₁Bantu bami, yizwani umthetho wami,

nibeke izindlebe zenu

emazwini omlomo wami.

₂Umlomo wami ngizowuvula,

ngisho umfanekiso,

ngizobonakalisa izimfihlakalo zasemandulo,

₃izinto esezwa ngazo sazazi,

esazitshelwa ngokhokho.

₄Asiyukubafihlela zona abantwana babo,

kodwa siyotshela izizukulwane

izibongo zikaSimakade,

amandla akhe nemisebenzi

emangalisayo ayenzileyo.

₅Wamisa isiyalo kwaJakobe,

washaya umthetho kwa-Israyeli,

wayala ukuba okhokho bethu

bawufundise abantwana babo,

₆ukuze waziwe yisizukulwane esilandelayo,

abantwana abayobazala nabo bavuke,

batshele abantwana babo ngawo.

₇Bayobeka ithemba labo kuNkulunkulu,

bangakhohlwa yimisebenzi kaNkulunkulu,

ukuze bagcine imiyalo yakhe.

₈Bangabi njengawoyisemkhulu,

isizukulwane esiphambeneyo nesihlubukayo,

isizukulwane esingaqinisanga inhliziyo yaso,

nesimoya waso wawungathembekile kuNkulunkulu.

₉Abantu bakwa-Efrayimi, sebehlomile bephethe iminsalo,

babuyela emuva ngosuku lwempi.

₁₀Kabasigcinanga isivumelwano sikaNkulunkulu,

benqaba ukuhamba ngomthetho wakhe.

₁₁Bayikhohlwa imisebenzi yakhe

nezimangaliso zakhe ayebabonise khona.

₁₂Izimangaliso wazenza phambi koyisemkhulu

eGibhithe, eZowani.

₁₃Wehlukanisa ulwandle, wabadabulisa kulo,

amanzi wawamisa anjengodonga.

₁₄Emini wabahola ngefu,

ubusuku bonke, ngokukhanya komlilo.

₁₅Waqhekeza amadwala ehlane,

wabaphuzisa benela,

kungathi kuvela ekujuleni.

₁₆Wenza kwagobhoza imithombo edwaleni,

amanzi wawenza ageleza njengemifula.

₁₇Nokho baqhubeka bona kuye,

bamhlubuka Ophezukonke ehlane.

₁₈Bamlinga uNkulunkulu enhliziyweni yabo

ngokucela ukudla ababekufisa.

₁₉Bakhuluma kabi ngoNkulunkulu, bathi:

“UNkulunkulu angalendlala yini itafula ehlane na?

₂₀Noma ashaya idwala kwaphuma amanzi,

kwampompoza imifula;

angabapha yini isinkwa

noma abahlinzeke ngenyama

abantu bakhe na?”

₂₁Ngakho-ke lapho uSimakade ekuzwa lokho,

wathukuthela, kwavutha umlilo kwaJakobe,

ulaka lwakhe lwehlela ku-Israyeli,

₂₂ngoba abakholwanga nguNkulunkulu,

abaze bethembela ensindisweni yakhe.

₂₃Nokho wayala amafu,

wavula iminyango yezulu,

₂₄wanisela phezu kwabo imana ukuze badle,

wabapha ukudla kwasezulwini.

₂₅Abantu badla isinkwa sezingelosi,

wabathumelela insada yokudla.

₂₆Wadedela umoya wasempumalanga ezulwini,

ngamandla akhe waqhuba umoya waseningizimu.

₂₇Wanisa inyama phezu kwabo njengothuli,

nezinyoni ezinamaphiko

zafana nesihlabathi solwandle.

₂₈Lokho wakwehlisa phakathi kwenkambu yabo,

naphakathi kwezindlu zabo.

₂₉Badla basutha kakhulu,

ngokuba Yena wabapha ababekufisa.

₃₀Babengakehlukani nokufisa kwabo,

besakumumethe ukudla kwabo emilonyeni,

₃₁ulaka lukaNkulunkulu lwehlela phezu kwabo,

wazibulala iziqhwaga,

waziqumba phansi izinsizwa zakwa-Israyeli.

₃₂Phezu kwakho konke lokho

baqhubeka nokona,

abaze bazikholwa izimangaliso zakhe.

₃₃Ngakho-ke izinsuku zabo waziqeda njengomoya,

neminyaka yabo, ngokwesaba.

₃₄Lapho ebabulala, bamfuna,

babuye bamfunisisa uNkulunkulu.

₃₅Bakhumbula ukuthi uNkulunkulu uyidwala labo;

uNkulunkulu Ophezukonke

ungumkhululi wabo.

₃₆Ngemilomo yabo babemthopha,

kodwa beqamba amanga bngezilimi zabo.

₃₇Inhliziyo yabo yayingabambelele kuye,

bengathembekile esivumelwanei sakhe.

₃₈Kepha Yena waba nobubele,

wabathethelela ububi babo,

akaze ababhubhisa,

yebo, wazibamba kaningi olakeni lwakhe,

wangayikhiphela kubo yonke intukuthelo yakhe.

₃₉Wakhumbula ukuthi bangabantu nje,

bangumoya owedlulayo ongenakubuya.

₄₀Babemhlubuka kaningi kangakanani ehlane,

bemdabukisa ogwadule!

₄₁Bamlinga uNkulunkulu bephindelela,

bemdabukisa oNgcwele ka-Israyeli.

₄₂Kabazange bawakhumbule amandla akhe,

nosuku abahlenga ngalo ezitheni,

₄₃ngesikhathi enza izibonakaliso

nezimangaliso eGibhithe, eZowani.

₄₄Waphendula imifula yabo yaba yigazi,

ukuze bangakwazi ukuphuza emithonjeni yabo.

₄₅Wabathumelela izibawu ezabalumayo,

namaselesele ababhubhisayo.

₄₆Ukudla kwabo wakunika imiswenya,

nomsebenzi wabo, isikhonyane.

₄₇Imivini yabo wayibulala ngesichotho,

nemikhiwane yabo, ngesangquma.

₄₈Izinkomo zabo wazinikela esichothweni

nezimvu nezimbuzi zabo, emibanini.

₄₉Ukuvutha kolaka lwakhe

wakuthululela phezu kwabo,

ulaka, ukufutheka nokuhlupheka,

ngokuthuma izithunywa zobubi.

₅₀Walungisela intukuthelo yakhe indlela,

akawuphephisanga umphefumulo wabo ekufeni,

kepha wanikela ukuphila kwabo ezifweni.

₅₁Washaya amazibulo wonke aseGibhithe,

okokuqala kwamandla abo, emathendeni kaHamu.

₅₂Kepha abantu bakhe wabakhipha njengezimvu,

njengomhlambi wabahola ehlane.

₅₃Wabahola kahle, abaze besaba;

ulwandle lwazisibekela izitha zabo.

₅₄Wabayisa emngceleni wakhe ongcwele

entabeni eyayizungezwe yisandla sakhe sokunene.

₅₅Waxosha abezizwe phambi kwabo.

Wadabula izwe,

wababela lona, laba yifa labo,

izizwe zakwa-Israyeli

wazihlalisa emathendeni azo.

₅₆Nokho bamlinga,

bamhlubuka uNkulunkulu oPhezukonke,

abaze babugcina ubufakazi bakhe.

₅₇Bahlehlela emuva, njengoyisemkhulu, bamkhohlisa,

baphambuka njengomnsalo ogejile.

₅₈Bamthukuthelisa ngezindawo zabo eziphakemeyo,

bamcunula ngezithombe zabo.

₅₉Ngesikhathi uNkulunkulu ekuzwa lokho

wabathukuthelela,

wamlahla impela u-Israyeli.

₆₀Walilahla ithabanakeli eliseShilo,

ithende ayelimise phakathi kwabantu bakhe.

₆₁Amandla akhe wawanikela ekuthunjweni,

nenkazimulo yakhe, esandleni sesitha.

₆₂Abantu bakhe wabanikela enkembeni,

ifa lakhe walithukuthelela.

₆₃Izinsizwa zakhona zagwinywa ngumlilo,

izintombi zakhona zangahayelwa nkondlo.

₆₄Abaphristi bakhona bawa ngenkemba,

abafelokazi bakhona abaze balila.

₆₅INkosi yayisivuka kwasengathi ibikade ilele

njengeqhawe elehlulwe yiwayini.

₆₆Izitha zayo yazichithela emuva,

yazithela ngehlazo elingunaphakade.

₆₇Yayilahla indlu kaJosefa,

ayaze yasikhetha isizwe sakwa-Efrayimi.

₆₈Kepha yaqoka isizwe sakwaJuda,

intaba iZiyoni eyithandayo.

₆₉Indlu yayo engcwele yayakha njengezintaba,

nanjengomhlaba ewusekele

kuze kube phakade.

₇₀Yakhetha uDavide, inceku yayo,

yamthatha ezibayeni zezimvu.

₇₁Wayeselandela izimvukazi ezenyisayo,

yamthatha ukuba eluse

abantu bayo, uJakobe

nefa layo, u-Israyeli.

₇₂Wabelusa ngenhliziyo eqotho.

Wabahola ngesandla esinekhono.