AMahubo 71

₁Kuwena, Simakade, ngiyakhosela,

mangingajabhi naphakade.

₂Ngokulunga kwakho ngikhulule, ungihlenge;

beka indlebe yakho kimi, ungisindise.

₃Yiba yidwala lami lokukhosela,

engiza kulo njalo;

uyalezile ukuba ngisindiswe,

ngokuba uyidwala lami nenqaba yami.

₄Nkulunkulu wami, ngikhulule esandleni sesikhohlakali,

nasekuxhakathisweni yisandla sowenza okubi nesowonakeleyo.

₅Ngokuba Wena, Nkosi Simakade,

uyithemba lami;

ngethembele kuwe kwasebusheni bami.

₆Ngancika kuwe kwasekuzalweni kwami,

nguwe owangikhipha esibelethweni sikamame.

Ukudumisa kwami njalo kungawe.

₇Kwabaningi bengifana nesimangaliso,

kodwa Wena uyisiphephelo sami esinamandla.

₈Usuku lonke, umlomo wami

ugcwele ukukubonga nokukubabaza.

₉Ungangilahli ngesikhathi sobudala,

ungangishiyi lapho sengiluphele,

₁₀ngokuba izitha zami zikhuluma ngami,

nabaqamekela umphefumulo wami

bahlangana ngami, bangihlebe,

₁₁bathi:

“UNkulunkulu umshiyile;

mxosheni, nimbambe,

ngokuba akekho ongamkhulula.”

₁₂Nkulunkulu, ungabi kude nami,

Nkulunkulu, phuthuma ungisize.

₁₃Abamelene nami befuna umphefumulo wami

mabajabhe, baphele.

Labo abafuna ukungilimaza,

mabathelwe ngehlazo, bahlazeke.

₁₄Kepha mina ngizohlala ngikwethemba njalo,

ngizokubonga ngingaphezi.

₁₅Umlomo wami uzolanda ngokulunga kwakho

nensindiso yakho usuku lonke,

ngokuba anginakukubala.

₁₆Ngizofika ngikubonge

ngezenzo zamandla zeNkosi uNkulunkulu;

ngizokudumisa ngokulunga kwakho,

kwakho wedwa.

₁₇Nkulunkulu, wangifundisa kwasebusheni bami,

namanje ngisamemezela

ngemisebenzi yakho emangalisayo.

₁₈Nalapho sengimdala, sengiyimpunga,

uze ungangishiyi,

ukuze ngishumayele ubukhulu bakho kwabasazozalwa,

namandla akho ezizukulwaneni.

₁₉Nkulunkulu, ukulunga kwakho kufinyelela ezulwini,

Wena owenza izinto ezinkulu.

Nkulunkulu, ngubani onjengawe na?

₂₀Wena owasikhombisa izinhlupheko ezimbi eziningi,

uyobuye usiphilise,

usikhuphule ezinzulwini zomhlaba.

₂₁Yandisa udumo lwami, ubuye ungiduduze.

₂₂Nkulunkulu wami, ngizobubonga ubuqotho bakho,

ngogubhu lwezintambo, ngikudumise ngehabhu,

Wena oNgcwele ka-Israyeli.

₂₃Izindebe zomlomo wami zizojabula,

nomphefumulo wami ukuhubele,

ngokuba ungihlengile.

₂₄Usuku lonke ulimi lwami

luzokhuluma ngokulunga,

ngokuba labo abafuna ukungenzakalisa

bazothelwa ngehlazo, baphoxeke.