AMahubo 69

₁Ngisindise, Nkulunkulu,

ngokuba amanzi asesentanyeni.

₂Ngibisha obhukwini lodaka,

akukho ndawo yokubeka unyawo,

ngingene otweni ngathi shi,

imisinga iyangisibekela.

₃Ngikhathele wukukhala,

umphimbo wami ugagadekile.

Amehlo ami anqundekile

ngukulindela uNkulunkulu wami.

₄Abangizondela ize baningi

ukwedlula izinwele ekhanda lami,

baningi abafuna ukungibhubhisa;

izitha zami zingethwesa icala ngeze.

Kumele ngibuyisele engingakwebanga.

₅Nkulunkulu, Wena uyabazi ubuwula bami,

nezono zami azifihlakele kuwe.

₆Mabangahlazeki ngami abakulindelayo,

Nkosi, Simakade Wamabandla.

Mabangathelwa ngehlazo ngenxa yami

labo abakufunayo, Nkulunkulu ka-Israyeli.

₇Ngokuba ngichashwa ngenhlamba ngenxa yakho,

ihlazo lisibekele ubuso bami.

₈Sengaba ngumfokazi kubafowethu,

nowezizwe kubantwana bakamame.

₉Ngokuba ukushisekela indlu yakho kungidlile,

izinhlamba zabakuthukayo zehlele phezu kwami.

₁₀Ngakhala, umphefumulo wami wazila,

kwaba ngukudunyazwa kwami.

₁₁Isaka ngalenza isembatho sami,

ngaba yisaga kubo.

₁₂Abahlezi esangweni bakhuluma ngami,

izidakwa zihaya ingoma ngami.

₁₃Kepha mina ngikhuleka kuwe, Simakade.

Ngesikhathi esifanele,

Nkulunkulu, ngobukhulu bomusa wakho,

ngiphendule ngeqiniso lensindiso yakho.

₁₄Ngitakule odakeni, ngingabishi,

mangikhululwe ezitheni zami

nasemanzini ajulileyo.

₁₅Izikhukhula mazingangisibekeli,

utwa lungangigwinyi,

nomgodi ungangivaleli.

₁₆Ngiphendule, Simakade,

ngokuba umusa wakho muhle,

ngokwesihawu sakho esikhulu, phendukela ngakimi.

₁₇Ungayifihleli ubuso bakho inceku yakho,

ngokuba ngikhathazekile,

phuthuma ungiphendule.

₁₈Sondela kuwo umphefumulo wami,

uwuhlenge,

ngikhulule ngenxa yezitha zami.

₁₉Wena uyakwazi ukwethukwa kwami,

nehlazo lami, nokudunyazwa kwami.

Zonke izitha zami ziphambi kwakho.

₂₀Ukwethukwa kuyephulile inhliziyo yami,

ngagula kakhulu, ngafisa ukuzwelwa,

kodwa angitholanga baduduzi.

₂₁Banginika inyongo ibe ngukudla kwami,

ekomeni kwami bangiphuzisa uviniga.

₂₂Itafula labo malibe wugibe kubo,

nesihibe sezitha zabo.

₂₃Amehlo abo mawanqundeke

ukuze bangaboni,

izinkalo zabo ziqhaqhazele njalo.

₂₄Ukunengwa kwakho kuthele phezu kwabo,

intukuthelo yakho evuthayo ibafice.

₂₅Umuzi wabo ubhubhe,

kungabi bikho ohlala emathendeni abo.

₂₆Bahlukumeze labo obashayile,

bakhuluma ngobuhlungu

babalinyaziweyo bakho.

₂₇Yengeza ukona kwabo phezu kokunye,

mabangezi ekulungeni kwakho.

₂₈Mabesulwe encwadini yabaphilayo,

bangalotshwa kanye nabalungileyo.

₂₉Kepha mina ngihluphekile, nginobuhlungu.

Nkulunkulu, insindiso yakho mayingilondoloze.

₃₀Ngizolibonga igama likaNkulunkulu ngehubo,

ngimbabaze ngokubonga.

₃₁Lokho kuzomthokozisa kakhulu uSimakade,

ukwedlula inkabi

noma inkunzi enezimpondo nezinselo.

₃₂Akuthi lapho abacindezelweyo bekubona, bethabe,

nina enifuna uNkulunkulu

mazivuseleleke izinhliziyo zenu.

₃₃Ngokuba uSimakade uyabezwa abentulayo,

akabadeleli abakhe ababoshiweyo.

₃₄Izulu nomhlaba makumbonge,

izilwandle nakho konke okuphila kukho.

₃₅Ngokuba uNkulunkulu uzolisindisa iZiyoni,

ayakhe imizi yakwaJuda,

bahlale kuyo, libe yifa labo.

₃₆Abantwana bezinceku zakhe bazolidla

libe yifa labo,

nalabo abathanda igama lakhe

bazohlala kulo.