AMahubo 59

₁Nkulunkulu wami, ngikhulule ezitheni zami,

ungivikele kwabangivukelayo.

₂Ngikhulule kwabenza okubi,

ungisindise kubantu abomele igazi.

₃Ngokuba, bheka, baqamekela impilo yami,

iziqhwaga ziyangihlanganyela, kungekho siphambeko

nasono kimi, Simakade.

₄Ziyagijima, zizilungisele, ngingenacala,

vuka ungihlangabeze, uzibonele ngawakho.

₅Wena, Simakade Nkulunkulu Wamabandla,

Nkulunkulu ka-Israyeli, vuka ujezise zonke izizwe,

ungahawukeli namunye kwabahlubukileyo. Sela

₆Babuya kusihlwa, bahlabe umkhulungwane njengenja,

bezulazula emzini.

₇Bheka, bayakhafula ngemilomo yabo,

amazwi abo ayizinkemba ezindebeni zabo,

ngokuba bathi:

“Ngubani ozwayo na?”

₈Kepha Wena Simakade uyabahleka,

ubaklolodele bonke abezizwe.

₉Ngenxa yamandla akho, ngizokulindela,

ngokuba uNkulunkulu uyinqaba yami.

₁₀UNkulunkulu wami uzongihlangabeza ngomusa wakhe;

uNkulunkulu uzongibonisa izitha zami zinqotshwa.

₁₁Ungazibulali, funa abantu bakithi bakhohlwe,

kodwa zihlakaze ngamandla akho,

uziqumbe phansi, Nkosi,

sihlangu sethu.

₁₂Amazwi eziwasho ngezindebe zazo ayisono

esiphuma emlonyeni wazo,

mazibambeke ekuqhosheni kwazo,

nangenxa yesiqalekiso namanga eziwakhulumayo.

₁₃Ziqede nya, ngolaka,

uzishabalalise ziphele nya,

mazazi ukuthi nguNkulunkulu

obusa kwaJakobe,

kuze kube semikhawulweni yomhlaba. Sela

₁₄Zibuya kusihlwa, zihlabe umkhulungwane njengenja,

zizulazule emzini.

₁₅Zehla zenyuka zifuna ukudla;

uma zingasuthi, ziyagwavuma.

₁₆Kepha mina ngizakuhlabelela ngamandla akho,

ngithabele umusa wakho ekuseni,

ngokuba uyinqaba yami

nesiphephelo sami

ngosuku lokuhlupheka kwami.

₁₇Mandla ami, ngizohubela Wena;

ngokuba uNkulunkulu, uyinqaba yami,

unguNkulunkulu wami onomusa.