AMahubo 49

₁Lalelani lokhu nina bantu,

nonke bekani indlebe,

nonke zakhamuzi zasemhlabeni,

₂abantukazana nezikhulu,

abacebileyo nabantulayo.

₃Umlomo wami uzokhuluma ukuhlakanipha,

ukuzindla kwenhliziyo yami

kuzokuba ngukuqonda.

₄Ngizakubeka indlebe yami kuso isaga,

ngiphenye imfumbe yami ngehabhu.

₅Yini ebengizoyesaba ngesikhathi senhlupheko,

lapho ngihaqwa wububi babangizingelayo,

₆labo abethembela engcebeni yabo,

baqhoshe ngobuningi bomcebo wabo na?

₇Impela umuntu angemhlenge umfowabo,

noma amhlawulele kuNkulunkulu.

₈Ngokuba ukuhlengwa kwempilo yakhe

kubiza kakhulu,

ngeke kwafinyelelwa kukho nanini,

₉ukuze umuntu aphile ingunaphakade,

angaliboni igodi.

₁₀Qha, uyabona ukuthi abahlakaniphileyo bayafa,

nokuthi isiwula nesiphukuphuku siyabhubha;

umcebo wabo bawushiyele abanye.

₁₁Ukucabanga kwabo kuthi izindlu zabo

zizakuma kuze kube phakade,

nemizi yabo, ezizukulwaneni ngezizukulwane;

amazwe abo bawaqamba ngamagama abo.

₁₂Kepha umuntu, nakuba enodumo,

akayukuhlala angafi,

ufana nezilwane ezibhubhayo.

₁₃Le ndlela yabo ingubuwula babo,

balandelwa ngabathokozela amazwi abo. Sela

₁₄Baqhutshelwa endaweni yabafileyo njengezimvu,

ukufa kuyakubelusa,

ngakusasa abaqotho babusa phezu kwabo,

isimo sabo siqedwe yindawo yabafileyo,

bangabe besaba nandlu.

₁₅Kepha uNkulunkulu uyakuwukhulula

umphefumulo wami esandleni sendawo yabafileyo,

ngokuba uyakungamukela. Sela

₁₆Ungesabi uma umuntu eba yisicebi,

nxa umcebo wendlu yakhe wanda.

₁₇Ngokuba ekufeni kwakhe akayukumuka nalutho,

umcebo wakhe awuyukwehla naye.

₁₈Noma engawubusisa umphefumulo wakhe esaphila,

futhi abantu bamtuse,

ngokuba uzenzele kahle,

₁₉nokho uyakuya esizukulwaneni sokhokho bakhe,

abayukukubona ukukhanya naphakade.

₂₀Umuntu ebukhazikhazini bakhe engenakuqonda,

unjengezilwane ezibhubhayo.