AMahubo 24

₁Umhlaba ungokaSimakade nakho konke okukuwo,

izwe nabakhileyo kulo,

₂ngokuba nguye owawumisa phezu kwezilwandle,

wawusekela phezu kwemifula.

₃Ngubani nje oyokhuphukela

entabeni kaSimakade na?

Ngubani oyokuma

endaweni yakhe engcwele na?

₄Yilowo onezandla ezihlanzekileyo,

nenhliziyo emsulwa,

ongazibandakanyi nokungamanga

futhi ongafungi ngenkohliso.

₅Uyofumana isibusiso kuSimakade,

nokulunga kuNkulunkulu wensindiso yakhe.

₆Yilesi isizululwane salabo abamfunayo,

labo abafuna ubuso bukaNkulunkulu kaJakobe. Sela

₇Phakamisani, amakhanda enu masango!

Niphakame nani minyango yaphakade,

phakamani ukuze iNkosi yenkazimulo ingene.

₈Ingubani le Nkosi yenkazimulo na?

InguSimakade onamandla, oyiqhawe,

uSimakade oyiqhawe empini.

₉Phakamisani amakhanda enu masango!

Niphakame nani minyango yaphakade,

ukuze iNkosi yenkazimulo ingene.

₁₀Ingubani le Nkosi yenkazimulo na?

InguSimakade Wamabandla,

nguYena oyiNkosi yenkazimulo. Sela